Январь ойида мамлакатда кўплаб товар ва хизматлар нархи ўсди. Айниқса, хизматлар йиллик инфляцияси анча юқори бўлди. Бу ҳақда Статистика агентлиги эълон қилган таҳлилда баён этилган.
2025 йил январда Ўзбекистондаги ойлик инфляция 0,7 фоизни, йиллик инфляция 9,9 фоизни ташкил этди (2024 йил мос даврида 8,6 фоиз бўлган).
Ўтган ой давомида озиқ-овқат маҳсулотлари 0,8 фоиз, ноозиқ-овқат маҳсулотлари 0,3 фоиз ва хизматлар 1,1 фоиз қимматлашган.
Январда бир йил мобайнидаги хизматлар инфляцияси камида 15 йиллик рекордларни янгилаб, 27 фоизга етган. Озиқ-овқат маҳсулотлари қиймати йиллик ҳисобда 2,6 фоиз, ноозиқ-овқатлар 7,7 фоиз ошган.
Январь ойида қуйидаги асосий озиқ-овқат маҳсулотлари нархлари ошган:
- Мол гўшти — 1,1 фоиз;
- Қўй гўшти — 1,2 фоиз;
- Кунгабоқар ёғи — 2,2 фоиз;
- Пахта ёғи — 1,9 фоиз;
- Картошка — 23,9 фоиз;
- Пиёз — 3,4 фоиз;
- Сабзи — 2,9 фоиз;
- Булғор қалампири — 13,2 фоиз;
- Банан — 6,5 фоиз;
- Бақлажонда — 59,6 фоиз.
Ўтган ойда дори воситалари ва тиббиёт маҳсулотлари нархи 0,7 фоизга кўтарилди.
Расмий статистикага кўра, январда бензин республика бўйича ўртача 1,5 фоизга қимматлашган. Пропан эса 13,2 фоизга арзонлаган. Бироқ биржада мазкур ёнилғи нархи 20 фоиздан кўпроқ ошган (3 январь, 31 январь).
Ой давомида мамлакатда ҳайдовчиликка тайёрлаш бўйича ўқув курслари нархи ўртача 12,5 фоизга ошди.
Январда таълим соҳаси хизматлари ҳам сезиларли қимматлашди. Масалан, республикада давлат боғчаларига ойлик тўлов миқдори ўртача 21 фоизга оширилди. Хусусий боғчалардаги нархлар 1,1 фоизга ўсди.
Давлат боғчаларига тўловлар йиллик ҳисобда қарийб 45,2 фоизга қимматлашган.
Ўтган ойда репетиторлар хизматлари нархлари 1 фоиз, ўқув курсларида ўқитиш 2,1 фоиз ўсган.
Йўловчи ташиш транспорти нархи 0,5 фоиз, товарларни ташиш бўйича хизматлар 2,3 фоизга ошган.
Аввалроқ Марказий банк 2024 йил якунида Ўзбекистонда инфляция даражаси дастлаб 9 фоиз, кейин 9,5 фоиз бўлишини прогноз қилганди. Бироқ йил сўнгида инфляция 9,8 фоиз шаклланди. Марказий банк раиси Тимур Ишметов журналистлар билан мулоқотда нархлар ўсиши нега кутилмалардан юқори бўлганига изоҳ берган.
“Ўтган йилнинг охирида инфляция даражаси кутилмадан бир оз баланд шаклланганига энергия нархлари эркинлаштирилишининг иккиламчи таъсирлари, гўшт, картошка, ўсимлик ёғи таклифи билан боғлиқ омиллар таъсир қилган. Шу омиллар сабаб иккинчи ярим йилликда инфляция даражаси кутилганидан секинроқ пасайган. Коммунал хизматларни ҳисобга олмаганда ҳам, хизматлар гуруҳи инфляцияси умумий инфляция даражасидан юқори шаклланмоқда”, деган Марказий банк раҳбари.
Шу билан бирга, жорий йилда мамлакатда энергия, коммунал хизматлар ва ёнилғи тарифлари оширилиши хабар қилинган.
“Энергия ва ёнилғи нархлари ўсиши инфляция ошишига 1,8–1,9 фоиз атрофида бирламчи таъсир қилиши кутилмоқда”, деган Тимур Ишметов.
2019 йилдаги президент фармонида Марказий банкка инфляцияни 2021 йилда 10 фоизга пасайтириш, 2023 йилда эса 5 фоиз даражадаги доимий инфляцион мақсадни (таргет) ўрнатиш топширилган. Бироқ бу мақсадга ҳалигача етилгани йўқ.
Бугунгача инфляция таргетлари бир неча марта ўзгартирилди. Хусусан, 2020 йилда 5 фоизлик таргет кўрсаткичига эришиш муддати 2023 йилга, 2022 йилдаги мақсад 2024 йил охирига, ўтган йили эса бу муддат 2025 йил иккинчи ярмига кўчирилган.
Сўнгги прогнозларга кўра, 5 фоизлик инфляция даражасига 2026 йилнинг иккинчи ярмида эришиш кутилмоқда.
Изоҳ (0)