Toshkentda noqonuniy diniy jamoat ortidan bojxona idoralari xodimlariga jinoyat ishi qo‘zg‘atildi

Toshkent shahrida DXX va IIV xodimlari tomonidan o‘tkazilgan tezkor tadbirda noqonuniy diniy jamoat fosh etildi.

Poytaxtdagi milliy taomlar oshxonalaridan birida tungi vaqtda bojxona idoralarining 3 nafar xodimi, Toshkent davlat sharqshunoslik universiteti talabasi, texnopark direktori o‘rinbosari, xususiy avtomaktab direktori o‘rinbosari, “Sergeli-avto” bozorida savdo bilan shug‘ullanuvchi shaxslar va boshqalardan iborat jami 17 kishi ovqatlanish bahonasida to‘planib, turli xil diniy adabiyotlardan foydalangan holda noqonuniy jamoat ko‘rinishidagi yig‘inlarni tashkil etgan.

1976—2001-yillar oralig‘ida tug‘ilgan mazkur shaxslarning ko‘pchiligi asli namanganlik bo‘lib, hozirda Toshkent shahrida istiqomat qilishadi.

Aniqlanishicha, Bojxona qo‘mitasining boshqarma boshlig‘i o‘rinbosari dinga mutaassiblarcha berilib, 2021-yildan boshlab mazkur norasmiy diniy darslarni muntazam ravishda tashkil etib kelgan. U har bir dars uchun jamoat a’zolaridan ma’lum miqdorda pul yig‘ib, ustozlarga bergan.

Guruh a’zolari 1989-yilda Namangan viloyatida tug‘ilgan va hozirda Misrda bo‘lgan shaxsdan Telegram orqali onlayn tarzda saboq olgan. Shuningdek, ularga Toshkent davlat sharqshunoslik universiteti talabasi ham offlayn tarzda diniy ma’ruzalar o‘tgan.

Hozirda Bojxona qo‘mitasi boshqarma boshlig‘i o‘rinbosari, bojxona organlari tezkor xodimi va katta inspektori, shuningdek, Toshkent davlat sharqshunoslik universiteti talabasi hamda jamoat a’zolariga Misr davlatidan turib, onlayn tarzda diniy saboq bergan fuqaroga nisbatan Jinoyat kodeksining 216-moddasi (jamoat birlashmalari yoki diniy tashkilotlarni qonunga xilof ravishda tuzish) bilan jinoyat ishi qo‘zg‘atilib, tergov harakatlari olib borilmoqda.

Qolgan fuqarolar jinoyat ishi doirasida gumonlanuvchi sifatida tergovga jalb qilingan.

Bundan bir necha kun avval Farg‘ona viloyatining Buvayda tumanida hujra sharoitida diniy saboq berib kelgani aniqlangandi. 1991-yilda tug‘ilgan shaxs 2022-yilda diniy taʼlimotdan saboq berish tartibini buzgani uchun sudlangan bo‘lishiga qaramasdan 1996-yilda tug‘ilgan turmush o‘rtog‘i bilan birgalikda yashash xonadonining yerto‘la qismida 30 nafar shaxsga hujra sharoitida diniy saboq berib kelgan.

Yerto‘lada taʼlim olayotganlarning 23 nafari voyaga yetmaganlar bo‘lib, ular orasida nafaqat Farg‘ona viloyati, balki Sirdaryo, Namangan, Surxondaryo viloyatlaridan ota-onalari tomonidan olib kelinganlari ham bor.