Яшнобод туманида Кичик ҳалқа автомобиль йўлининг Махтумқули кўчасига туташган қисмини қайта қуриш ишлари ниҳоясига етказилди. Бу ҳақда Тошкент шаҳар ҳокимлиги хабар берди.
Маълум қилинишича, ҳокимлик ҳузурида ташкил этилган “Тошкент инвест компанияси” АЖ мутахассислари халқаро экспертлар билан ҳамкорликда транспорт оқимини ўлчаб, ўрганиб чиқди ҳамда таҳлил қилди. Қиш мавсумига қарамасдан, ишлар иложи борича қисқа муддатларда амалга оширилди.
Эндиликда Махтумқули кўчасидан КҲАЙга чиқиш темирйўл ва автомобиль кўприклари остида ўтгандан сўнг, ўнгга бурилиш орқали амалга оширилади. Кичик ҳалқа автомобиль йўлига чиқишда ҳам ўнгга, ҳам чапга (светофор ёрдамида) бурилиш мумкин. Кичик ҳалқа йўлидан эски “ТошМИ” томон чиқиш эса энди йўл ўтказгич ёнидан эмас, балки ундан олдинроқ бошланади.
Ишлар доирасида 5700 метр квадрат йўл қопламаси ётқизилди. Шунингдек, 800 метр сув чиқариш лотоклари ўрнатилди. Шу билан бирга, 1825 метрга бордюр тоши қўйилди. Бундан ташқари, 610 метр пиёдалар йўлаги барпо этилди. Яна 150 метр дренаж қувурлари ётқизилди, 80 метр металл панжаралар ўрнатилди.
“Ҳудуд пиёдалар эҳтиёжларини инобатга олган ҳолда ободонлаштирилмоқда, имконияти чекланган шахслар учун қўшимча қулайликлар яратилди”, дейилади хабарда.
Изоҳ (0)