G‘ildirakli mini-uylar va boshqa mobil xonadonlarni ishlab chiqarish bilan shug‘ullanadigan muhandislar xonadondagi har bir joyni tejash, uy egasiga keng imkoniyatlar berish hamda vaqtinchalik foydalanadigan joylarni kengaytirish usullari ustida izlanishlar olib boradi. Ularning natijasi o‘laroq Lyuksemburgda olti kishini o‘zida sig‘diradigan havo gumbazli uy ixtiro qilindi.
E22SSPIU! deb nomlangan loyiha Lyuksemburgning Esh shahrida “2001” kompaniyasi tomonidan ishlab chiqilgan. Mazkur loyiha uy-joy qurilishidagi yangi tadqiqotlarning bir qismidir.
Konstruksiya asosi zanglamaydigan po‘latdan ishlangan ikki o‘qli tirkamadan iborat. Orqa tomonda joylashgan katta oynadan tashqari, uyning deyarli hech qayerida derazalar yo‘q. Kirish qismida kichik metall pandus mavjud.
Uy transportirovkasi vaqtida faqat pastki qavatdan foydalanish mumkin. Xonadonning birinchi qavatida dush, rakovina, hojatxona, turli javonlar, muzlatgich va kichik oshxona o‘rin olgan.
E22SSPIU! Harakatda bo‘lmagan vaqtda uyning ikkinchi qavatini ko‘tarish mumkin. Buning uchun pnevmatik tayanchlar yordamida avval tom ko‘tariladi va pol hosil qilinadi. So‘ng kompressor yordamida katta ikki qavatli gumbazga havo puflanadi. Xonadonning ikkinchi qavati tayyor! U yer yotoqxona uchun mo‘ljallangan bo‘lib, olti kishini o‘ziga sig‘diradi.
Ikkinchi qavatning interyerida hech qanday elementlar yo‘q, u yer yagona bir keng xona va bir nechta matraslardan iborat. Xonadon egasi ikkinchi qavatdan yotoqxona sifatida foydalana oladi. U erga oshxonadagi zinapoya yoki lift orqali chiqish mumkin.
Bunday yechim amalda qulay emasdir, ammo tez-tez ko‘chib yuradigan aholi uchun kichik joydan maksimal darajada foydalanish g‘oyasi foydali bo‘lishi mumkin.
Izoh (0)