«Миллий тикланиш» Марказий кенгаши Ахборот хизмати Халқ депутатлари Бўстонлиқ тумани Кенгаши депутати Кабул Дусовнинг «Файзбоғ» ахборот каналига берган интервьюси юзасидан расмий баёнот берди.
«Миллий тикланиш» демократик партияси Марказий кенгаши шуни маълум қиладики, Кабул Дусовнинг партия аъзолигидан чиқиш ҳақидаги мурожаати маълумот учун қабул қилинди.Тармоқларда Тошкентнинг Яшнобод тумани аҳолиси Халқ депутатлари Бўстонлиқ тумани Кенгаши депутати, «Миллий тикланиш» партиясидан бўлган Кабул Дусов Махтумқули кўчасидан 22-авиашаҳарчага алоҳида ўзи учун кириш йўлини очмоқчилигидан норозилиги тасвирланган видео тарқалган эди. Кейинроқ депутат барча ҳужжатларни расмийлаштиргани, Тошкент шаҳар ҳокимиятидан, шаҳар Йўл ҳаракати хавфсизлиги бошқармасидан ва бошқа ташкилотлардан рухсат олгани, бироқ аҳоли бунга қарши чиққани ҳақида вазиятга изоҳ ҳам берганди. Куни кеча эса, депутатнинг «Менинг юртим» телеканли мухбирига қилган қўполлиги тасвирланган видео тарқалди.Унинг ижтимоий тармоқлар ва айрим сайтлардаги чиқишларида партия уставига риоя этмаганлиги, шунингдек, партия обрўсига путур етказувчи ахборотларни тарқатгани, партия имижини оширишга тўсқинлик қилувчи ҳаракатларни амалга оширгани учун кўп минг сонли партия аъзоларининг Кабул Дусовга нисбатан партиявий чора кўриш ҳақидаги мурожаатларини инобатга олган ҳолда 2019 йил 1 ноябрь куни бўлиб ўтадиган партиянинг навбатдаги съездида халқ депутатлари маҳаллий Кенгаш депутатлигига кўрсатиладиган номзодлар таркибидан чиқарилганлигини маълум қиламиз.
Халқ депутатлари Бўстонлиқ тумани Кенгаши депутати томонидан партия раҳбари номига айтилган асоссиз, шахсий ғараз мақсадларига таянган бўҳтонлар депутатнинг шахсига баҳо бериш учун кенг жамоатчиликка етарли бўлишини инобатга олиб, партия ушбу масалани муҳокама учун мавзу эмас, деб ҳисоблайди.
Ҳуқуқий жиҳатдан Ўзбекистон Маъмурий жавобгарлик тўғрисидаги Кодекснинг 40—41-моддаларига мувофиқ («Туҳмат», «Ҳақорат қилиш»), судга мурожаат қилиш учун барча далиллар ва асосларнинг мавжудлигига қарамасдан партия раҳбари ушбу ҳуқуқдан фойдаланмаслигини маълум қиламиз.
Ўзбекистон «Миллий тикланиш» демократик партияси Марказий кенгаши бундан буён ҳам барча даражадаги депутатлардан партиявий интизомга қатъий риоя қилиш, сайловчилар эътирозига сабаб бўлувчи, партия электорати манфаатларига зид келувчи ҳаракатларни амалга оширмасликни ҳамда депутатлик масъулиятини оширишни талаб этади. Амалдаги қонунчиликка асосан, бундай ҳолларда депутатларнинг ваколатларини муддатидан аввал тўхтатиш мумкинлигини маълум қилади.
«Миллий тикланиш» Марказий кенгаши Ахборот хизмати
Эслатиб ўтамиз, депутат Кабул Дусов аёлларнинг сиёсатга аралашишини қоралагани ҳамда Шавкат Мирзиёевдан уйғурларни ҳимоя қилишни илтимос қилиб ёзган постлари орқали танилган эди.
Изоҳ (0)