Сергелидаги омонат кўприк аҳоли норозилигига сабаб бўлгач, ҳокимлик муаммони ҳал қилишга киришди (видео)

Пойтахт Тошкентнинг Сергели туманидаги маҳаллада мактаб ўқувчилари лой кечиб, канализация қувурларидан келган чиқинди сувлар оқиб ўтувчи канал устидаги омонат кўприкдан ўқишга қатнайди. Бу ҳақда “Дарё”га ҳудудда яшовчи аҳоли вакиллари гапириб берди.

Бу кўприкдан машиналар ўтиб-қайтади. Канализация қувурларидан келган сувлар оқиб ўтувчи бу канал устидаги кўприк жуда хавфли ҳолатга келиб қолган. Кўп қаватли уйларда яшовчиларнинг фарзандлари айнан шу кўприкдан ўтиб, мактабга боради. Канализация сувлари оқиб ўтувчи каналга ёш бола тушиб кетса, уни ҳеч ким қутқариб ололмайди. Тушиб кетган бола газланиб, ўлим ҳолати рўй бериши мумкин, дейди Ҳумоюн Эргашев.

Мурожаатчининг айтишича, ҳокимлик мазкур кўприкни янгилаб, йўлларни асфалтлашни ваъда қилган.

Масъуллар, айнан раҳбарлар фарзандининг шу йўлдан ўтиб, мактабга қатнашига рухсат берадими? Улар ҳам мен каби болаларини жуда яхши кўришса керак, албатта. Бу йўлдан ўтишга нафақат болаларим, шахсан ўзим ҳам қўрқаман. Шу боис машинамда ўтаман, машинада оқизиб кетмаса керак, дейди Тўра Хушвақтов.

Ушбу кўприкдан мактабга қатновчи ўқитувчиларнинг айтишича, муаммо анчадан бери бор ва ечимини топмаяпти.

“Янги қўшнилар” турар жой мажмуасида яшаймиз. Шу ҳудуддаги 76-мактабда ишлайман. Шу йўлдан ҳар куни ўтишга мажбур бўламиз. Оёқларимиз лой бўлиб кетади. Биз-ку амаллармиз, аммо бу ердан ўтувчи 1-синф болалари жуда қийналишади. Лойда юриш жудаям қийин. Оёқ кийимларимиз тизза бўйи лойга ботади. Бу ҳолатда мактабга бориш ҳам жуда ноқулай, ўқувчиларимизнинг олдида ҳам анча ҳижолат бўламиз. Қор ёғган кунлари бу ердан умуман ўтиб бўлмайди. Баъзида канал суви тўлиб оқади. Бу бизга янаям хавф туғдиради, дейди лойли кўприкдан ўтиб ишга қатновчи ўқитувчи Гўзал Бегалиева.

Сергели ҳокимлигининг мазкур ҳолатга муносабат билдиришича, туманнинг “Юқори Дархон” маҳалласида жойлашган метро бекати яқинидаги “Янги қўшнилар” турар жой мажмуаси 2022 йилда қурила бошланган бўлиб, канал устидаги қўлбола кўприк ҳам ўша пайтда қурилиш ташкилоти техникалари ўтиб-қайтиши учун вақтинча барпо этилган.

Қурилиш объектига юк машиналарининг кириши учун “Жунариқ” ва “Юқори Дархон” маҳаллалари орасидан ўтувчи Жун каналига вақтинчалик кўприк ўрнатилганди. Ушбу йўлдан “Янги қўшнилар” турар жой мажмуасининг қурилиши якунлангунга қадар фойдаланилган. Жорий йилда ушбу хонадонларга аҳолининг 30 фоизи кўчиб келган бўлиб, улар орасида фарзандларини умумтаълим мактабига жойлаштириш эҳтиёжи юзага келган. Яқин атрофда умумтаълим мактабининг йўқлиги сабаб мазкур ҳудуддаги болалар шу йўлдан фойдаланиб, 76-мактабга қатнай бошлаган. Бугунги кунда мазкур турар жой мажмуасидан 28 нафар ўқувчи ушбу мактабга қатнайди, дейилади ҳокимлик муносабатида.

76-мактабда ишловчи яна бир ўқитувчи Гулнора Матёқубова масъуллар мактаб ўқувчилари учун ҳам бу муаммога эътибор қаратишлари лозимлигини айтмоқда.

Ҳар куни мана шу йўлдан ўтиб, мактабга келамиз. Йўлимиз жуда ёмон. Бемалол ўтиб-кайтиш имкони йўқ. Масъул ходимлардан йўлимизни тўғрилаб беришларини илтимос қилган бўлардик. Болаларимизга ҳам яхши бўлар эди, чунки янги домлар қурилгач, бу ерда яшовчи болалар 76-мактабга қатнашига тўғри келяпти, дейди Гулнора Матёқубова.

Ҳокимликнинг қайд этилишича, улар аҳоли мурожаатларини инобатга олиб, “Янги қўшнилар” турар жой мажмуасидан 76-сонли мактабгача бўлган йўл таъмирини бошлаб юборган.

Ушбу йўл сифатли асфалт қопламаси билан қопланиб, ўқувчилар хавфсизлигини таъминлаш учун пиёдалар йўлаги ҳам қурилади. Ҳокимлик аҳоли учун юзага келган ноқулайликлар учун узр сўрайди ва тушуниш билан ёндашганликлари учун миннатдорлик билдиради. Шунингдек, ушбу масала ёритилишида кўмак берган “Daryo.uz” сайти мухбирларига ҳам ўз миннатдорчилигимизни изҳор этамиз, дейди ҳокимлик масъуллари.