Мадриднинг “Реал” клуби ҳужумчиси Килиан Мбаппе Испания Кубоги доирасида "Сельта"га қарши ўйинда гол уриб, клуб тарихида фақат Карим Бенземага насиб этган ноёб натижани такрорлади. Бу ҳақда MisterChip (Alexis) ўзининг Х ижтимоий тармоғидаги саҳифасида маълум қилди.
Маълумотларга кўра, Мбаппе бир мавсумда олтита турли турнирда гол уришга муваффақ бўлди. Бунгача буни фақат Карим Бензема 2022—2023 йилги мавсумда амалга оширган эди. Жорий мавсумда Мбаппе Испания чемпионати, Испания Суперкубоги, мамлакат кубоги, Чемпионлар Лигаси, Қитъалараро кубок ва УЕФА Суперкубогида гол уришга эришди.
Эслатиб ўтамиз, Килиан Мбаппе ёзги трансфер ойнасида “Реал”га ўтганди. Футболчининг клуб билан шартномаси 2029 йилгача мўлжалланган.
Аввалроқ Килиан Мбаппе клуб билан барча совринларни ютиш нияти борлигини айтганди.
16 январь куни Испания Кубоги 1/8 финал босқичи доирасида “Реал” “Сельта”ни қабул қилди. Асосий вақти дуранг билан тугаган учрашувнинг қўшимча вақтларида “қироллик клуби” 3 та гол урди ва якунда 5:2 ҳисобида ғалаба қозониб, турнирнинг чорак финал босқичига йўл олди.
Изоҳ (0)