Madridning “Real” klubi hujumchisi Kilian Mbappe Ispaniya Kubogi doirasida "Selta"ga qarshi o‘yinda gol urib, klub tarixida faqat Karim Benzemaga nasib etgan noyob natijani takrorladi. Bu haqda MisterChip (Alexis) o‘zining X ijtimoiy tarmog‘idagi sahifasida ma’lum qildi.
Ma’lumotlarga ko‘ra, Mbappe bir mavsumda oltita turli turnirda gol urishga muvaffaq bo‘ldi. Bungacha buni faqat Karim Benzema 2022—2023-yilgi mavsumda amalga oshirgan edi. Joriy mavsumda Mbappe Ispaniya chempionati, Ispaniya Superkubogi, mamlakat kubogi, Chempionlar Ligasi, Qit’alararo kubok va UEFA Superkubogida gol urishga erishdi.
Eslatib o‘tamiz, Kilian Mbappe yozgi transfer oynasida “Real”ga o‘tgandi. Futbolchining klub bilan shartnomasi 2029-yilgacha mo‘ljallangan.
Avvalroq Kilian Mbappe klub bilan barcha sovrinlarni yutish niyati borligini aytgandi.
16-yanvar kuni Ispaniya Kubogi 1/8 final bosqichi doirasida “Real” “Selta”ni qabul qildi. Asosiy vaqti durang bilan tugagan uchrashuvning qo‘shimcha vaqtlarida “qirollik klubi” 3 ta gol urdi va yakunda 5:2 hisobida g‘alaba qozonib, turnirning chorak final bosqichiga yo‘l oldi.
Izoh (0)