Йигирма йилдан буён ўзбек санъатида фаолият юритаётган Зиёда бу йил 36 ёшни қарши олди. Ижодни эрта бошлаган ва ҳамкасбларига нисбатан анча тез танилган хонанда нафақат ижоди, балки шахсий ҳаёти билан ҳам эътирофга лойиқ.
“Санъаткор бўлмайди, турмушга берамиз”
Хонанда Зиёда Рустам Қобилов оиласида дунёга келган. Оилада 7 қиз ва бир ўғил фарзанд бор. Зиёда болалигидан санъатга қизиққани, аммо оиладаги шароит ва отасининг қаршилиги сабаб, қизиқишларини ошкор қилолмагани ҳақида қуйидагиларни сўзлаб берди.
— Катта оила бўлганмиз, турган гапки рўзғорда ўзига яраша қийинчиликлар бўлган. Онам моҳир ошпаз эди ва болаликдан бизни ҳам меҳнатга ўргатганди. Юқори синфда ўқиётганимда бозорда кичик тамаддихона очган. Уч-тўртта ишчилари ҳам бор эди. Аммо дарсдан кейин онамнинг олдига бориб қарашиб юрардим. Официантлик қилганим ёки идиш-товоқ ювганимдан ҳеч қачон афсусланмайман.
Санъатга болаликдан қизиққанман, аммо дадам раҳматли ҳамиша “Қиз болага ярашмайди”, деб қаршилик қиларди. Охири 9-синфни битирганимдан кейин “Бир марта имкон беринг, мусиқа коллежида ўқишни истайман”, деганимда қатъий рад жавобини олганман. Шунда онам ёнимни олиб “Коллежни тугатиши билан турмушга берамиз, санъаткор бўлмайди”, деган. Шу сабаб дадам мусиқа коллежида ўқишимга рози бўлган, дейди хонанда Зиёда.
“Моддий қийинчиликлар бизда ҳам бўлган”
Хонанда отасининг моддий аҳволи ёмонлашгани, онасига нимча сотиб олиб бериш учун тўйларда қўшиқ куйлаганини эслайди.
— Моддий қийинчиликлар ҳамма қатори бизда ҳам бўлган. У пайтларда “дом”нинг олтинчи қаватида яшардик. Еттита қиз, бу катта рўзғор дегани эди. Отамнинг иши бирдан орқага кетди, беш йилча яхшигина қийналдик. У пайтлари тахминан 13-14 ёшлардаги қиз эдим. Қариндош уруғларимиз тўйларга чақиришарди ва қўшиқ куйласам пул қистиришарди. Уларни чўнтагимга солишга уялардим, аммо қўлимдан ҳам қўймасдим. Чунки онамнинг нимча олиш орзуларини амалга оширишни ният қилгандим, дейди хонанда Зиёда.
“Турмуш ўртоғим билан бозорда танишганмиз”
Хонанда турмуш ўртоғи билан болаликдан таниш бўлгани ва биринчи марта бозорда бир-бирини учратиб қолгани ҳақида гапириб берди.
— Турмуш ўртоғим билан бозорда танишиб қолганмиз. У чинни сотарди, баъзида бизнинг тамаддихонада овқатланиб турарди. Бундан ташқари, опаларимнинг сарпосига қўйиладиган чинниларни ҳам у кишидан олгандик. Элдор ака билан тўйдан 8 йил аввал таниш бўлганмиз. Табиатан оғир-босиқ бўлгани учун онам ҳар доим “Сизни ўзим куёв қиламан, маъқул йигитсиз”, дерди. Қарангки, фаришталар омин деган экан, оила қурдик. Аммо санъаткор бўлиш ниятим у одамга унчалик ёқмаганди. “Бекор қиляпсиз-да”, деб ҳам қўйганди, дейди Зиёда.
“Кастингдан ўтолмаганман”
Зиёда “Akfa” продюссерлик марказига қандай бориб қолгани ва илк кастингдан ўтмагани ҳақида қуйидагиларни сўзлаб берди.
— Кастинг ҳақида мусиқа коллежидаги устозимдан эшитиб қолганмиз. Ўшанда Нигора иккимиз дарсдан чиқиб, “Akfa” компаниясини излаб борганмиз. Аввалига кастинг ҳақида ота-онамга айтмаганман. Чунки улар қарши бўлишларини аввалдан тахмин қилгандим. Аксига олиб кастинг топшириладиган кун томоғим бўғилиб қолган. Ўшанда Самандар Ҳамроқулов ва компания раҳбарлари ҳайъат аъзоси бўлганди. Нигора синовдан ўтган, аммо мени қабул қилишмаган. Енгилган курашга тўймас дейишганидек, “Бир ҳафта муҳлат беринглар, соғайиб қайтадан иштирок этаман”, деганман. Самандар ака кўнглимни оғритмаслик учун “Майли, тайёрланиб келинг”, деган. Тузалиб, янги қўшиққа тайёрланиб, қўшимчасига иккинчи кастингда рақс ҳам тушиб берганман. Ойбек билан бирга кастинг топшириб, иккимиз ҳам синовдан ўтганмиз. Аммо энг катта муаммо ана шундан кейин бошланган. Дадамга кастингдан ўтганимни айтганимда роса тўполон бўлган. “Тез боргин-да, дадам рухсат бермадилар деб шартномани бекор қилгин”, деган. Ялиниб-ёлвориб, кўзёш тўкиб продюссерлик маркази билан ишлашга дадамни кўндирганман, дейди Зиёда.
Плагиат билан бошланган ижод
Зиёда ижодини плагиат қўшиқдан бошлаган. Яъни у украин хонандаси Руслананинг Wилд данcес қўшиғини “Севмаганман” деб ўзбекчалаштирган. Қўшиқ кўпчиликка маъқул келган ва хонанданинг танилишига ҳисса қўшган.
— Клип суратга олинганидан кейин дискка ёздириб, бозорга олиб боргандим. Турмуш ўртоғимга “Қаранг, клипим чиқди”, деб мақтаниб кўрсатганимда яна “Бекор қилибсиз-да”, деган. Кўпчилик тўйдан аввал гаплашиб, феъл-атворни ўрганиш керак дейди. Аммо бизда бундай бўлмаган. Шунчаки иш юзасидан гаплашардик ва у инсон билан қалбан яқин эканимни ҳис қилардим.
Қўшиқ ва клипларим аввалига дадамга ёқмаган. Чунки у пайтлари рақсга тушиб, қўшиқ куйлаш урфда эди. Адашмасам, фақатгина Фаҳриддин Умаровнинг “Муҳаббат” қўшиғини айтганимда “Бўларкан-ку, мана шундай қўшиқ айтиш керак”, деган эътирофни эшитганман, дейди Зиёда.
“Оилам тинчлиги учун керак”
Айни кунда хонандага турмуш ўртоғи продюссер ва маъмурлик қилади. Аввалига буни кўпчилик танқид қилди.
— Турмуш ўртоғим санъатдан бутунлай йироқ инсон эди. Аммо санъаткор ҳақида турли гап-сўзлар бўлади. Шунинг учун турмуш ўртоғимдан бирга ишлайлик, деб илтимос қилганман. У инсон чинни бизнесини ташлаб, мен билан ишлаган. Бу оиламнинг тинчлиги учун муҳим эди, дейди хонанда Зиёда.
“Рол ижро этиш ёқмаган”
Ўзбекистонда хизмат кўрсатган артист Зиёда ижодининг илк йилларида кўплаб фильмларда суратга тушган. У “Бойвачча”, “Аччиқ ҳаёт”, “Нортой”, “Бекорчилар макони”, “Энагалар”, “Ижарачилар” ва “Учрашув” фильмларида рол ўйнаган. У Жаҳонгир Позилжоновнинг комедия фильмларида навбатчи актриса бўлган, десак хато бўлмайди. Аммо хонанда кейинги пайтларда фильмларда суратга тушаётгани йўқ. Унинг вақти тиғиз, балки ортиқча рекламага ҳам зарурат сезмаётгандир.
— Рол ижро этиш аввалдан ёқмаган, маҳоратим ҳам умуман йўқ деб ҳисоблайман. Бу менинг эмас, продюссерларнинг хоҳиши эди, дейди хонанда.
“Эгизакларга ўхшаймиз”
Хонанда Зиёданинг ташқи кўриниши ўзига ўхшаш синглиси бор. Азиза Қобилова ҳам санъатга қизиқиб, шу йўналишда таҳсил олган.
— Азиза билан эгизакларга ўхшаймиз. У билан боғлиқ қизиқарли воқеалар кўп бўлган. Масалан, кўча-кўйда одамлар Азизани мен деб ўйлаб, у билан расмга тушган. Ҳатто худди шундай ҳолат концертларда ҳам бўлган. Азизанинг овози ниҳоятда ширали, фақат йўналиши бошқача. У кўпроқ хориж мусиқасига қизиқади. Райёна исмли ширин қизчаси бор, дейди хонанда Зиёда.
“Менга ортиқча гап-сўзлар керакмас”
Хонанданинг ҳаётида айрилиқлар, қийин кунлар кўп бўлган. 2017 йили дадасидан айрилган, ундан кейин ҳомиласи нобуд бўлган. Орада ҳамкасблари, хусусан қўшиқ сабаб Дилсўз билан жиддий келишмовчиликка борган. Аммо хонанда ҳамиша сукут сақлашга ва ортиқча ҳис-ҳаяжонга берилмасликка ҳаракат қилади.
— Муаммолар, негатив фикрлар ҳамиша бўлади. Менинг аниқ мақсадим бор, шу бўйича ҳаракатланаман. Ҳамма муаммога тўхталиб, негативчиларнинг фикрини эшицам вақт ва асабимни йўқотаман. Менга ортиқча гап-сўзлар керак эмас, дейди хонанда Зиёда.
“Ҳамма мени устимдан кулаётгандек туюларди”
Хонанда интервьюларининг бирида кучли руҳий тушкунликка тушгани, йиғлоқи бўлиб қолганини эслайди.
— Бир неча йил олдин кучли руҳий тушкунликка тушдим. Балки бунга отамнинг бевақт ўлими сабаб бўлгандир. Ҳозир ҳам отам билан боғлиқ воқеаларни эсласам йиғлаб юбораман. Кўчага чиққим келмай қолган. Ёнимга аччиқ қаҳва ва қора шоколадни қўйиб, хонага ёлғиз ўтиришни ёқтириб қолгандим. Санъаткормиз вазиятимиз қандай бўлишидан қатъий назар халқ хизматида бўлишимиз керак. Тўйлардан одамлар менга қараб туриб ҳам бир-бири билан гаплашаётган бўлса, худди устимдан кулишаётгандек ўзимни ноқулай ҳис қилардим. Ташқарига чиқиб, беихтиёр йиғлаб юборардим.
Ҳозир ҳам тушкунликка тушишимизга сабаб бўладиган воқеалар бўлади. Аммо менга иммунитет ҳосил бўлган, дейди хонанда.
“Турмуш ўртоғим уй бекаси бўлишимни хоҳлайди”
Хонанда санъатда қийналган вақтлари турмуш ўртоғи, ҳаммасини йиғиштириб оддий уй бекаси бўлишни таклиф қилиши ҳақида гапирди.
— Санъаткор бўлиш осонмас, баъзан инсон ҳам руҳан, ҳам жисмонан чарчайди. Шундай пайтда турмуш ўртоғим “Ҳаммасини йиғиштириб, уйда ўтиринг”, деб таклиф қилади. Бу гап анчадан бери бор. Гап пулда эмас, санъатни севган инсон ундан айро яшаши жуда қийин. Шу боис, озгина ишлай деб ортга сураман, дейди хонанда.
Изоҳ (0)