“Дарё” нашрида “Бировнинг судидаги бегона шахслар: ЖИБ Юнусобод судида иккита иш битта залда кўрилдими?” номли мақола чоп этилган эди. Шу материалга Тошкент шаҳар суди саволларга тўла муносабат билдирибди.
Ўзи нима гап?
Сайт мухбири мақолада Жиноят ишлари бўйича Юнусобод туман судида ишлар ўз вақтида бошланмагани, бунга ўзи ҳам гувоҳ бўлгани ва бир суд мажлисида 6 нафар бегона шахс: икки нафари “панжара” ортида, яна тўрт нафари залнинг бир четида ўтириб қатнашганини ёзган. Масъул идоралардан ҳолат ўрганилиб, жавоб берилиши сўралган эди.
Камераларни кўтарса бўлади
Мақолада 17 декабрь куни соат 16:00 га белгиланган суд мажлиси айтилган пайтдан уч соатга яқин вақт ўтса-да, бошланмагани ва мухбир судни кутмай кетгани айтилган. Лекин Тошкент шаҳар суди ўз муносабатида суд мажлиси белгиланган вақтда, яъни соат 16:00 да бошланганини айтган.
Журналист суд қайси вақтда бошланганини исботлай деса, унинг телефони кириш эшигида олиб қолинган. Ўқувчида суд биносидаги камералар кўтарилса, масала ҳал бўлади-ку, деган ўринли эътироз бўлиши мумкин. Ҳамма гап шунда. Муносабат билдиришдан аввал Тошкент шаҳар суди бунга эътибор қилгани ё қилмагани таҳририятга қоронғи. Агар шаҳар суди малака ҳайъати хоҳласа, хизмат текшируви белгилаб, камераларни кўтариши кифоя. Агар айнан ўша куни судга ўрнатилган камералар “ўз-ўзидан ишламай қолган” бўлмаса, албатта.
“Туш ўнг бўлмас, ўнг туш бўлмас, э хуллас, бари бир гўр”
“Дарё”даги мақолада асосий савол — бировнинг судида 6 нафар бегона шахснинг нима қилиб ўтиргани эди. Тошкент шаҳар суди мазкур сўроққа ўз муносабатида қуйидагича жавоб берган:
“Шу куни суд муҳокамаси залида бошқа жиноят иши кўрилиб тугатилганидан сўнг ушбу жиноят иши кўрилган ҳамда мазкур жиноят иши кейинга қолдирилгач ҳам, бошқа жиноят иши ҳам мазмунан кўрилган”...
Қандай тушундингиз?
Саволлар ўша-ўша. Улар ҳамон очиқ. Кутишда, воқеалар ривожини кузатишда давом этамиз.
Изоҳ (0)