“Daryo” nashrida “Birovning sudidagi begona shaxslar: JIB Yunusobod sudida ikkita ish bitta zalda ko‘rildimi?” nomli maqola chop etilgan edi. Shu materialga Toshkent shahar sudi savollarga to‘la munosabat bildiribdi.
O‘zi nima gap?
Sayt muxbiri maqolada Jinoyat ishlari bo‘yicha Yunusobod tuman sudida ishlar o‘z vaqtida boshlanmagani, bunga o‘zi ham guvoh bo‘lgani va bir sud majlisida 6 nafar begona shaxs: ikki nafari “panjara” ortida, yana to‘rt nafari zalning bir chetida o‘tirib qatnashganini yozgan. Masʼul idoralardan holat o‘rganilib, javob berilishi so‘ralgan edi.
Kameralarni ko‘tarsa bo‘ladi
Maqolada 17-dekabr kuni soat 16:00 ga belgilangan sud majlisi aytilgan paytdan uch soatga yaqin vaqt o‘tsa-da, boshlanmagani va muxbir sudni kutmay ketgani aytilgan. Lekin Toshkent shahar sudi o‘z munosabatida sud majlisi belgilangan vaqtda, yaʼni soat 16:00 da boshlanganini aytgan.
Jurnalist sud qaysi vaqtda boshlanganini isbotlay desa, uning telefoni kirish eshigida olib qolingan. O‘quvchida sud binosidagi kameralar ko‘tarilsa, masala hal bo‘ladi-ku, degan o‘rinli eʼtiroz bo‘lishi mumkin. Hamma gap shunda. Munosabat bildirishdan avval Toshkent shahar sudi bunga eʼtibor qilgani yo qilmagani tahririyatga qorong‘i. Agar shahar sudi malaka hayʼati xohlasa, xizmat tekshiruvi belgilab, kameralarni ko‘tarishi kifoya. Agar aynan o‘sha kuni sudga o‘rnatilgan kameralar “o‘z-o‘zidan ishlamay qolgan” bo‘lmasa, albatta.
“Tush o‘ng bo‘lmas, o‘ng tush bo‘lmas, e xullas, bari bir go‘r”
“Daryo”dagi maqolada asosiy savol — birovning sudida 6 nafar begona shaxsning nima qilib o‘tirgani edi. Toshkent shahar sudi mazkur so‘roqqa o‘z munosabatida quyidagicha javob bergan:
“Shu kuni sud muhokamasi zalida boshqa jinoyat ishi ko‘rilib tugatilganidan so‘ng ushbu jinoyat ishi ko‘rilgan hamda mazkur jinoyat ishi keyinga qoldirilgach ham, boshqa jinoyat ishi ham mazmunan ko‘rilgan”...
Qanday tushundingiz?
Savollar o‘sha-o‘sha. Ular hamon ochiq. Kutishda, voqealar rivojini kuzatishda davom etamiz.
Izoh (0)