Намибиянинг амалдаги вице-президенти Нетумбо Нанди-Ндаива 27 ноябрь куни бўлиб ўтган давлат раҳбари сайловида ғалаба қозонди. Бу ҳақда сайлов комиссияси бюллетенларни санаш якунлангач маълум қилди.
Мамлакат тарихида биринчи марта бу лавозимни аёл киши эгаллайди. У февралда Хаге Гейнгоб саратон касаллигидан вафот этганидан кейин президент сифатида қасамёд қилган Нанголо Мбумбани ўрнини эгаллайди.
Сайлов комиссияси маълумотларига кўра, овоз беришда иштирок этганларнинг 57 фоизи Нанди-Ндайтва хонимга овоз берган. Сайловда 15 нафар номзод иштирок этган. Биринчи турда ғалаба қозониш учун овозларнинг ярмидан кўпи ва битта овоз керак эди.
Нетумбо Нанди-Ндаива 72 ёшда. У СССРда ўқиган ва у ерда “Коммунистик ёшлар ҳаракати иши ва амалиёти” мутахассислиги бўйича диплом олган. Кейинги йилларда сиёсатчи турли давлат лавозимларида ишлаган ва парламент депутати бўлган.
Мухолифат натижалардан норози
Техник муаммолар, жумладан сайлов бюллетенлари етишмаслиги ва бошқа қийинчиликлар туфайли овоз бериш шанба кунигача узайтирилганидан сўнг, мухолифат партиялари сайлов натижаларини тан олишдан бош тортди. Узун навбатлар туфайли баъзи сайловчилар овоз беришнинг биринчи кунида 12 соатгача кутиб, охир-оқибат воз кечишга мажбур бўлди.
Мухолифат партиялари овоз бериш муддатининг узайтирилишини ноқонуний деб ҳисоблаб, сайлов натижаларига қарши судга мурожаат қилишга ваъда берди.
Изоҳ (0)