Sankt-Peterburgda O‘zbekiston fuqarosi besh yilga qat’iy tartibli axloq tuzatish koloniyasida jazo o‘tashga hukm qilindi. Bu haqda Rossiya Tergov qo‘mitasi shahar boshqarmasiga tayanib, “78.ru” xabar berdi.
Ma’lum qilinishicha, o‘zbekistonlik erkak jinoyat kodeksining (JK) ikkita moddasi bo‘yicha aybdor deb topilgan:
- Rossiya JK 111-moddasi 2-qismi “z” bandi (qurol ishlatgan holda qasddan sog‘liqqa og‘ir shikast yetkazish);
- 322.1-moddasi 1-qismi (noqonuniy migratsiyani tashkil etish).
Tergov va sud tomonidan aniqlanishicha, mahkum 14-fevral kuni Dimitrov ko‘chasidagi uylardan birining zinapoyasida vatandoshiga pichoq bilan hujum qilgan. Bundan tashqari, u 2023-yil mart oyidan 2024-yil fevraligacha kvartirasini ikki o‘zbekistonlikka yashash uchun noqonuniy bergan.
U ushbu shaxslarning Rossiyada vaqtinchalik yashash joyi bo‘yicha ro‘yxatdan o‘tmaganini bilgan, ya’ni ularning Rossiyada noqonuniy bo‘lishi va yashashi uchun sharoit yaratgan, deyiladi xabarda.
Sud erkakka qamoq jazosidan tashqari, u kaltaklagan tanishiga ma’naviy zarar uchun 500 ming rubl (salkam 59 million 500 so‘m) miqdorida tovon to‘lashga majbur qildi.
Izoh (0)