O‘zbekistonda xizmat ko‘rsatgan artist, ko‘plab xit qo‘shiqlar muallifi, xonanda, bastakor Anvar G‘aniyev “Daryo”ga bergan intervyusida qaysi qo‘shiq uni mashhur qilgani, onasidan ayrilib kuy yozgani va unga nisbatan qilingan nohaqlik haqida gapirdi.
— Bolaligimda O‘zbekiston xalq artisti, rahmatli Sherali Jo‘rayevning qo‘shiqlarini magnitofonda yig‘lab eshitardim. Shu insonning qo‘shiqlarini tinglab, maza qilib, zavqlanib, san’atga kirib kelganman desam ham bo‘ladi.
Ancha yillar avval “Ko‘ngil ko‘chalari” nomli serial chiqqandi. Shu serial ijodkorlari serialga saundtrek yozib, o‘zim kuylab berishimni so‘ragan. She’r berilgan, men kuyga solib, ijro qilishim kerak edi. O‘sha vaqtda 30 yosh edim, shuncha buyuk ustoz san’atkorlar turganda, menga ishonib topshirildi deya, qo‘shiqni yurakdan ijro etganman. O‘zimning nolalarim dard-u hasrat bilan kuylaganim sabab bu saundtrek serialning ajralmas qismiga aylangan, hammaga manzur bo‘lgan. O‘sha davrdan hozirgacha qayerga borsam, shu qo‘shig‘imni aytmasdan ketolmayman. Sababi konsert bo‘ladimi, to‘y bo‘ladimi, shuni aytib bering deyishadi, deydi Anvar G‘aniyev.
“Shu tariqa yaqinlarim “Shunday yuraverasanmi, ko‘zga ko‘rinarli biror nima qil, televideniyaga bor” degan. Televideniyada 10-15 kishilik eng yaxshi qo‘shiqchi, shoir va bastakorlardan iborat badiiy kengash bo‘lardi. Kengash juda qattiqligi sabab necha yillab sinovdan o‘tolmay yurganmiz. Qo‘shiqchi badiiy kengashdan o‘tmasa qo‘shiqlari na telekanallarda, na radioda ketardi. Haqiqatan mehnat qilib, harakat qilib oxiri qabul qilinganman”.
— Yangi ijod namunalaridan 3-4 tasini tayyorlayapman, bitib qolgan. Ona haqida qo‘shiqni mendan ko‘p so‘rashadi. Avvalgi intervyularning birida to‘rt misra aytgandim, shuni haligacha so‘rashadi. Qo‘shiq tayyor, nasib bo‘lsa, yaqin kunlarda chiqaraman. Ona haqidagi qo‘shiqlarda bu zotga murojaat qilinadi, lekin ko‘plar bunday qo‘shiqlarni ijro qilib bera olmaydi. Sababi yosh o‘tganidan keyin boshqacha ijro qilinadi-da. Mening onam ham vafot etgan, qo‘shiqda “Onajonim, sizni qayerdan toparman?” degan kechinmalarim bor. Sevgi haqida, ayriliq haqida ham ijod qilaman, lekin ko‘proq hayotiy narsalarga e’tibor qarataman. Ilgari qo‘shiq matnini shoirlardan olardim, O‘zbekiston xalq shoiri Muhammad Yusuf bilan ishlaganman, hozir o‘zim yozyapman, dedi xonanda.
Ijodim davomida ko‘p yaxshi qo‘shiqlar aytdim, masalan, “Oh, sevaman ko‘zlaringni” degan qo‘shig‘im o‘z paytida xit bo‘ldi. Tarona Rekords tomonidan beriladigan “Yilning yaxshi qo‘shiqchisi”, “Eng yaxshi qo‘shiq” degan mukofotlar bor edi. U yillar “Oh, sevaman ko‘zlaringni” qo‘shig‘im ham mukofotlangan, lekin mukofotni biz olmaganmiz, boshqalarga berilgan. Mayli, Xudoga shukr, qo‘shiqlarim xalqimiz tomonidan sevib eshitiladi, muxlislari bor, deya ijodkor o‘sha vaqtlarni esladi.
— Yaxshi qo‘shiq qilaman deganlar juda ko‘p. Lekin hammaga manzur qilaman, ma’qul qilaman desa-yu, Xudodan iste’dod berilmasa, o‘z-o‘zidan bandasining qo‘lidan kelmaydi. Yoshlarga bir tavsiyam bor: inson samimiy bo‘lishi va kasbini sevishi kerak. O‘z ustida ishlash lozim. Demoqchiman-ki, Allohdan berilgan iste’dod bo‘lmasa, san’atkor bo‘lolmaydi. Ham mehnat, sabr va tavakkal qilish kerak. Shundagina ma’lum bir darajaga erishamiz. Insonlarga bir narsani ma’qul qilish juda qiyin, dedi ijodkor.
Izoh (0)