“Yomg‘ir” qo‘shig‘i bilan muxlislar eʼtiboriga tushgan xonanda Anvar Jo‘rayev konserti oldidan bergan intervyusida shaxsiy hayoti va xorijda ijod qilishining sabablari haqida gapirdi.
— Baʼzan ortda qolgan yillarga qaraganimda, ijodni endi boshlagan paytlarimiz yodimga tushadi. U paytda oddiy, yosh bola bo‘lganmiz. Gitarachi o‘rtog‘im bilan musiqiy sayqalchining oldiga borib, “Qaysi qo‘shiqni yozaylik”, deb maslahat qilardik. Aynan o‘sha “Yomg‘ir” qo‘shig‘i 25 yildan buyon tashrif qog‘ozimizga aylandi. Eski tarkibdagi do‘stlarim bilan munosabatlarimiz saqlanib qolgan. Ular Toshkentda yashaydi, hali ham ko‘rishib, gaplashib turamiz. Ammo ular sanʼatdan ketib, restoran biznesi bilan shug‘ullanadi. Sizlarga kichik bir sirni aytaman — konsertda ular ham qatnashadi. Chunki “Sahar”ning 25 yillik yubiley konsertida ular ham ishtirok etishi kerak, deydi Anvar Jo‘rayev.
Anvar Jo‘rayev bir muddat Qozog‘istonda ijod qilgani va O‘zbekistonga qaytib kelishining sabablari haqida gapirdi
— Qaytishimga O‘zbekistondagi atmosferaning o‘zgargani sabab bo‘ldi. 2017—2018-yilda kelganimda hamma narsa qanaqadir erkin va ozod bo‘lganligini sezdim. O‘zimga o‘zim “Endi qaytib, yana bir harakat qilib ko‘raman”, dedim. Boshqacha muhit sezildi, ozodlikni sezdim. Menda-ku avval ham qandaydir cheklovlar bo‘lmagan. Ammo tizim butunlay boshqacha edi. “O‘zbeknavo” bo‘lardi, qanaqadir tadbirlarga kimningdir jiyani, qizi yoki o‘g‘lining to‘yiga bepulga yuborishardi. Hozir hammasi o‘zgargan sanʼatkor borgan tadbiridan haq olyapti. Aslida ham mehnatiga yarasha pul to‘lanishi kerak, deydi Anvar Jo‘rayev.
Xonanda ikki marta omadsiz nikohga uchragani va to‘ng‘ich qizi uning kasbini tanlagani haqida gapirdi
— Inson hayotida har xil munosabatlarni boshdan kechirar ekan. Afsuski, ularning hammasi ham omadli bo‘lavermaydi. Ikki marta ajrashgandim, hozir uchinchi ayolim bilan yashayapman. Endi kimdir birinchi urinishdayoq baxtli bo‘ladi, kimdir esa qiyinchiliklarga duch keladi. Munosabatlar paytida ikkala tomon ham aybdor ekanini tan olish kerak. Ilk turmushimdan qiz, undan keyingisidan o‘g‘il farzand ko‘rganman. Hozirgi ayolim esa o‘g‘il va qiz farzandlarni dunyoga keltirgan — ular hali juda kichkina.
Birinchi ayolim bilan do‘stona munosabatdamiz, ammo keyingisi bilan unday deyolmayman. Ommaga chiqib, har xil gaplarni qildi, bu bilan faqat o‘zi va mening obro‘yimni to‘kdi xolos. To‘ng‘ich farzandimni o‘zim bilan tadbirlarga, studiyalarga olib borardim. U baʼzan divanda uxlab qolardi, shu tariqa unda sanʼatga qiziqish paydo bo‘ldi. Hozir u Olmaotadagi Karim Sarsoyev nomidagi sanʼat kollejida taʼlim oladi. Kelasi yil O‘zbekiston davlat konservatoriyasiga o‘qishga topshiradi. U Qozog‘istonda ko‘plab yutuqlarga erishdi, xalqaro tanlovlarda ishtirok etdi. Undan umidlarim katta, deydi Anvar Jo‘rayev.
Izoh (0)