Иқтисодиёт ва молия вазирлиги эълон қилган 2025—2027 йилларга мўлжалланган Бюджетномада мактаб дарсликлари учун ижара пулларини қайта тиклаш таклиф этилмоқда.
Унда келтирилишича, умумтаълим мактабларини дарсликлар билан таъминлашда ота-оналар иштирокини ошириш мақсадида 2025/26-ўқув йилидан 2–11-синфларда бир тўплам дарслик ва машқ дафтарлари учун ижара тўлови ундириш тизимини қайта йўлга қўйиш режалаштирилмоқда.
Лойиҳада қайд этилишича, 2024 йилда бир ўқувчи учун битта дарслик ва иш дафтарларининг ўртача нархи 450−500 минг сўмни (шундан машқ дафтарлари — 100−150 минг сўм) ташкил этган. Ҳужжатда бир тўплам учун 80 минг сўм (бир тўплам тан нархининг 16-18 фоизи) миқдорида ота оналар тўловини қайта тиклаш таклиф қилинмоқда. Ушбу тўловлар ҳисобига шаклланган 376,6 млрд сўм маблағлар ҳар йили ўқувчиларни машқ дафтарлари билан таъминлаш харажатларининг бир қисмини қоплашга йўналтирилади.
“Дарсликлар ва машқ дафтарларининг тўлиқ давлат бюджети ҳисобидан чоп этилиши ота-оналар масъулияти пасайиб кетиши ва дарсликларга нисбатан эътиборсиз муносабатда бўлиш ҳолатларини келтириб чиқармоқда”, дейилади Бюджетнома лойиҳасида.
“Газета.уз”нинг ёзишича, мактабгача ва мактаб таълими вазири ўринбосари Темуржон Комилов бу таклиф Иқтисодиёт ва молия вазирлиги билан ҳамкорликда ишлаб чиқилганини айтди.
“Бу таклиф даражасида турибди. Бу 1-синфдан ва ижтимоий ҳимоя реестрига кирган оилалардан ташқари. Бу ҳали жорий этилди, қабул қилинди, дегани эмас”, деган вазир ўринбосари 29 октябрь куни бўлиб ўтган матбуот анжуманида.
Маълум қилинишича, 2024 йилда дарсликлар учун 1,5 трлн сўм, келаси йили эса 1,3 трлн сўм маблағ сарфланиши кутилмоқда.
Ўзбекистонда 2022 йилдан бери мактаб дарсликлари учун ижара пули олинмаяпти. Ўша йилда мактаб дарсликлари ва машқ дафтарларининг ижара тўловлари миқдорлари кескин оширилиши муносабати билан кенг жамоатчилик, ота-оналар томонидан эътирозлар билдирилгач, президент сентябрь ойида мактаб дарсликлари ва машқ дафтарларини бепул ижарага беришни тезкор йўлга қўйиш юзасидан топшириқ берганди.
Изоҳ (0)