Чет элдаги ватандошларимиз, уларнинг ҳаёт йўли, эришган муваффақиятлари ҳақида ҳикоя қилувчи, шунингдек, барча ўзбекистонликларни бир ерга жамлаш мақсадида яратилган Uzbekistan's Club глобал платформаси яна бир катта лойиҳага қўл урди.
Эндиликда Uzbekistan’s Club жамоаси хорижда таълим олаётган ўзбекистонлик талабалар ҳаётини ҳам қамраб олади.
Шу мақсадда ташкил қилинган O‘zbekistonlik.Students лойиҳаси аксарият ёшларни қизиқтираётган мавзу: қандай қилиб дунёнинг энг нуфузли университетларига ўз кучи билан ўқишга кириш мумкин, қаерда ўқиса бўлади, имтиҳонлар қандай топширилади, чегаранинг нариги томонида талабаларни нималар кутяпти, стипендия олиш ва яшаш учун пул тўпиш йўллари қандай, каби саволларга тўғридан тўғри шу йўлни босиб ўтган хориждаги талабалардан жавоблар олишади.
Бундай ўзига хос ва таъсирчан контент ёшларга мотивация улашиб, уларнинг келгуси муваффақиятларида йўлчи юлдуз бўлиб хизмат қилади, албатта.
O‘zbekistonlik.Students янги ҳужжатли фильми қаҳрамонлари ўз тенгдошларига хорижда талаба бўлиш йўлида бошдан кечирганлари, ўз тажрибалари ҳақида сўзлаб беришади. Фильмнинг биринчи қисми премьераси 16 сентябрь куни соат 18:00 да My5 телеканали ва Uzbekistan’s Club’нинг YouTube каналида бўлиб ўтди.
Премьера эпизодида томошабинлар Оксфорд университети талабаси Муштарий Мадраҳимова ва East London Университети талабаси Азизбек Аҳмаджонов ҳикояларига гувоҳ бўлишади. Улар қандай қилиб Буюк Британиянинг энг яхши университетларига бепул ўқишга кириб, стипендия олишга эришганлари ҳақида, шунингдек, ўз сирлари билан бўлишишади.
O‘zbekistonlik.Students шоусининг бош ғояси — Ўзбекистон ёшларига хорижда ўқиш билан боғлиқ реал имкониятлар ҳақида айтиб бериш, шунингдек, машаққат билан ўқиган ва ишлаганлар дунёнинг энг яхши ОТМларини забт эта олишини, агар мақсад аниқ бўлса, йўлнинг охирида сизни доимо муваффақият кутиб туришини кўрсатишдан иборат. Яна бир жиҳат, шоу қаҳрамонлари сифатида фақатгина ўзининг меҳнаткашлиги ва тиришқоқлиги билан ўқишга киришга эришган талабалар танланган.
Қайд этиш жоиз, сериал бош ҳомийлари — Ucell уяли алоқа оператори ва Турин Политехника университети. Лойиҳа “қанотлари” — Uzbekistan Airways миллий авиакомпанияси. Лойиҳа Ўзбекистон Республикаси Ёшлари ишлари агентлиги ва Ташқи ишлар вазирлиги томонидан қўллаб-қувватланди.
Эслатиб ўтамиз, сериал “Ўзбекистонлик” фильмлари серияси ва шу номдаги халқаро форумлар орқали таниш бўлган Uzbekistan’s Club ижодий жамоаси томонидан суратга олинди. Шоу бошловчилари — таниқли блогерлар Ҳуснора Шодиева ва Тимур Алихонов. Режиссёр — Рустам Мелиев.
Изоҳ (0)