“Барселона” бош мураббийи Ханс-Дитер Флик Европа Чемпионлар Лигаси 3-туридан ўрин олган “Бавария”га қарши ўйиндаги йирик ғалабаси ҳақида фикр билдирди.
“Керакли натижага эришдик ва 3 очкони қўлга киритдик. Ўйин ажойиб ўтди. Биринчи голдан сўнг 10—15 дақиқа давомида бир оз қийналдик, аммо якунда жамоанинг бундай вазиятдан чиқиб кетганини кўриш ажойиб. Бизда ёш жамоа бор ва бундай ҳолатларни кўриш муҳим.
Бизнинг салоҳиятимиз анча юқори. Ҳар бир баҳсда шунга ўхшаш ҳаракатлар қилишга, ўйинимизни яхшилашга ҳаракат қиламиз. Бу — бизнинг мақсадимиз.
“Бавария” — фантастик ўйинчиларга эга ажойиб жамоа. Мен уларнинг ўйинини томоша қилишни ёқтираман.
Албатта, бундай ғалабаларни нишонласа арзийди, бу — жамоа учун ажойиб ютуқ. Ғалаба шанба кунги класико олдидан менга ишонч бағишлайди. Ҳозир “Бернабеу”даги ўйин ҳақида ўйламайман. Эртадан бошлайман”, дея германиялик мутахассиснинг сўзларини келтиради Marca.
Маълумот учун, Рафинья ҳет-трик қайд этган ўйинда “Барселона” 4:1 ҳисобида Германиянинг “Бавария” клубини мағлуб этди.
“Реал Мадрид” — “Барселона” учрашуви 26 октябрь куни бўлиб ўтади.
Изоҳ (0)