Қозоғистон ва Хитой ўртасидаги темирйўл чегараларидаги вазият йил давомида диққат марказида бўлди. Дўстлик чегара пунктидаги сўнгги ўзгаришлар ҳам бунга таъсир кўрсатди. Бу ҳақда RailFreight маълумот берди.
2024 йил бошида Қозоғистон сиғим чекловлари сабабли Хитойга темирйўл орқали дон экспортини тўхтатганди. Ҳозирги вақтда вазият янада кескинлашиб, Қозоғистондан Хитойга контейнер поездларининг жўнатилишига тўлиқ тақиқ икки марта узайтирилди ва камида ноябрь ойигача давом этади.
Қозоғистон расмийлари тақиқ сабабини инфратузилма чекловлари билан изоҳламоқда. Жумладан, “Дўстлик” чегара пункти ҳаддан ташқари юкланган бўлиб, сентябрь охирида тахминан 55 та контейнер поезди чегарада навбатда турган.
Бу қолоқлик Қозоғистон чегара объектларининг ортиб бораётган контейнерлар оқимини бошқариш қобилияти ҳақида саволлар туғдирди, дейилади хабарда.
Хитойга йўналган контейнер поездларининг тўхтатилишига қарамай, бошқа чегара пунктлари фаол бўлиб, Хитойдан Қозоғистонга қатновлар давом этмоқда. Бироқ мавжуд вазиятнинг кенгроқ таъсири борасида қарама-қарши фикрлар юзага келган.
Россиянинг Asia Import Group логистика компаниясининг сўнгги баёноти вазиятни янада мураккаблаштирмоқда.
Компаниянинг таъкидлашича, “Хитойдан Қозоғистон орқали Россияга темир йўл транспортида юк ташиш деярли имконсиз ҳолга келган.
Улар “Дўстлик” чегара пунктидаги тирбандлик туфайли сезиларли кечикишлар юз бераётганини айтмоқда. Бунда, юкларнинг ҳаддан ташқари кўплиги ва темир йўл платформаларининг етишмаслиги сабабли, юклар кўпинча станцияда бир ой ёки ундан ортиқ вақт кутиб қолмоқда. Компания бу ҳолатни Россиянинг Узоқ Шарқидаги вазият билан таққослайди, у ерда шунга ўхшаш муаммоларни ҳал қилиш учун муқобил транспорт усуллари қўлланилмоқда.
Аксинча Хитойнинг Тиэдада логистика компанияси “Дўстлик” чегара ўтиш пунктидаги вазиятни одатий ҳолат деб таъкидламоқда.
Хитойга кириб келаётган юқори ҳажмдаги ғалла, фойдали қазилмалар ва ёғоч маҳсулотлари, шунингдек Россиядан мунтазам импорт қилинаётган товарларнинг уйғунлашуви чегарада вақти-вақти билан тирбандликка сабаб бўлмоқда, тушунтирди компания.
Тиэдада буни фавқулодда ҳодиса эмас, балки мавсумий қонуният сифатида баҳолаб, яқин келажакда вазият яхшиланишини прогноз қилмоқда.
Бундан ташқари, компания Хитой—Европа йўналиши бўйлаб юк ташиш “Дўстлик”даги тирбандликдан келиб чиқмаётганини таъкидлайди. Улар сўнгги пайтларда Европага экспорт ҳажмининг пасайишини чегарадаги кечикишлар билан эмас, балки асосан денгиз орқали юк ташиш нархларининг тушиши билан изоҳлайди.
Изоҳ (0)