Ота-оналарнинг фарзанди келажагига масъулият билан ёндашуви боланинг яхши камол топиши ва муваффақиятга эришишидаги муҳим омилдир. Болаларни катта қилиш эса фильмларда рол ўйнаш каби осон иш эмас. Шунинг учун юлдузлар тарбия борасида баъзан турли тажрибалар ўтказишига тўғри келади. Қуйида турли соҳаларда машҳурликка эришган ота-оналарнинг тарбия методлари билан бўлишишга қарор қилдик.
Ким Кардашьян
Модель болалигидан юмшоқ табиатли бўлиб, она сифатида ҳам болаларига қаттиққўллик қилмайди. Боласи бир бор илтимос кўзлари билан қараши унинг қалбини эритиб юборади ва ошхонада яширилган барча ширинликларни беришга тайёр бўлади.
“Менинг кучим доимо ўзимни хотиржам тута олишимдадир. Болаларнинг ўйин-кулгиси ва шўхликлари менинг ғазабимни келтирмайди ва асабимни бузмайди. Чунки болаларга хос бундай табиий ҳолат хонадонимизнинг ажралмас қисмига айланган. Бизнинг уйимиз доимо чақалоқлар кулгиси ва шовқинига тўладир”, дейди Ким Кардашьян.
Шунга қарамай, Кардашьян яқинда ўғли Сент билан шартнома тузди. Қоидага кўра унинг YouTube’даги видеоблогида уйдаги шахсий вазият ва ҳолатлар чиқмаслиги лозим. Шу сабабли саккиз ёшли бола сирларни ошкор қилмаслик тўғрисида махфийлик шартномасини имзолаган.
Перис Ҳилтон
Перис она бўлганига ҳали кўп бўлгани йўқ. Унинг тўнғич фарзанди Феникс бир ёшдан ошган, Лондон исмли қизи эса ундан ҳам кичик. Аммо юлдуз аллақачон тарбия бериш бўйича ўз режаларини ишлаб чиққан. Актрисанинг фикрича, бугунги кунда болалар учун энг хавфли нарса бу гаджетлардир.
“Баъзи ота-оналар фарзанди жуда кичик давриданоқ қўлига смартфон тутади. Интернет олами эса болаларим кўрмаслиги керак бўлган маълумотларга тўла. Ўзимдан кутмаган эдим, лекин менимча қаттиққўл она бўлсам керак. Фарзандларим илк йилларида телефон кўрмасликлари учун қаттиқ курашаман”, дейди Перис.
Крис Ҳемсворт
Ҳеч қандай иш, ҳатто ўта банд кун тартиби ҳам Крис Ҳемсвортнинг ажойиб ота бўлишига тўсқинлик қилмайди. У бўш вақтини тоғларда, балиқ овида ва соҳилда оиласи билан ўтказади. Актёрнинг фикрича, у фарзандлари учун яхши ўрнак бўлиши муҳим.
“Болалар янги маълумотни шу қадар тез хотирасига жойлайдики, феъл-атворимиз ва барча яхши-ёмон амалларимизни ортимиздан такрорлайди. Сиз истайсизми-йўқми, болалар биринчи навбатда ота-онасидан андоза олади”, дейди актёр.
Крис камбағал оилада улғайган ва ота-онасини муваффақиятлари учун эмас, балки унга ва укаларига берган меҳри ва вақти учун ҳурмат қилади. Ҳемсворт бу тажрибани оиласида такрорлашга ҳаракат қилмоқда:
“Молиявий жиҳатдан биз болалик давримдан анча яхшироқ ҳолатдамиз, лекин фарзандларим бунга эришиш осон бўлмаслигини билишларини истайман. Бунинг учун ҳаракат қилиш керак ва буни одатий ҳол деб қабул қилмасликлари муҳим”.
Иен Сомерҳолдер
Актёрнинг қизи бу йил 7 ёшга тўлди. У фарзандига барча жонзотларга яхши муносабатда бўлишни ва уларга озор бермасликни ўргатади:
“Ёшлигимда кучуклар боласи билан тўла қафас ичига кирганим ҳамон ёдимда. Бундай ажойиб туйғуларни ҳеч қачон эсимдан чиқармайман”, дейди Сомерҳолдер.
Юлдуз қизига ҳам худди шундай илиқ туйғуларни сингдиришга ҳаракат қилади:
“Кичкина болаларни ҳайвонлар билан таништириш орқали инсонлардаги энг яхши фазилатларни намойиш этасиз”, дейди Иен.
Криштиану Роналду
Роналдудек футбол қиролининг фарзанди бўлиш осон иш эмас. Айниқса, гап спорт ҳақида кетганда. Аммо юлдуз фарзандларини бирор ишга доим мажбурламайди. Шунга қарамай, агар болалардан бири унинг изидан борса, футболчи жуда мамнун бўлишини тан олади:
“Фарзандларим қайси касб эгаси бўлишини фақат вақт кўрсатади. Мен уларга ҳаётий йўлини танлашда ҳеч қачон босим ўтказмайман. Улар истаганини қилсин. Асосийси, улар бахтли бўлса бас. Болаларим қандай йўлни танламасин, мен уларни доимо қўллаб-қувватлайман”.
Дарвоқе, Роналдунинг ўғли кичик Криштиану отасининг изидан кетмоқчи, у ҳам футболга жуда қизиқади:
“У футболда худди мен каби бўлишига юз фоиз ишончим комил. Ҳозирча мен унга баъзи сабоқларни бериб бормоқдаман”, дейди спортчи.
Изоҳ (0)