Иордания қироллик жуфтлиги ҳар доим бахтли ва хотиржам кўринади. Афтидан, қирол Абдулла II ўзининг гўзал Раниясини янги турмуш қурган пайтидек севади — гарчи уларнинг фарзандлари улғайган, ҳатто ўз оилаларига эга бўлган бўлса ҳам. Аммо Абдулланинг ўтмиши ҳақида кўпроқ маълумотга эга бўлсангиз, у нима учун хотини ва меросхўрлари билан тинч ва меҳрибон муносабатларини қадрлаши аниқ бўлади.
2023 йил март ойида Рания ва Абдулланинг тўнғич қизи 26 ёшли малика Имон молиячи Жамил Александр Термиотисга турмушга чиқди. 1 июнь куни эса 28 ёшли валиаҳд шаҳзода Ҳусайн ўзининг севгилиси, мултимиллионер ва аристократнинг қизи Ражва ас-Саифга уйланди.
52 ёшли қиролича Рания ва 61 ёшли қирол Абдулла хурсандчиликларини яширишмади: улар фарзандларининг танловини тўлиқ маъқуллашди. Иккала дабдабали тўйда дунё элитаси вакиллари қатнашди, келинларнинг либослари мавсум тенденцияларини белгилаб берди.
Лекин ҳар доим ҳам Иордания ҳукмдорларининг саройида бахтли самимий кулги янграмайди. Бу оиланинг тарихи бир қатор фожиали зарбалар билан ажралиб туради — улардан баъзилари ҳақида маълумот берамиз.
Суиқасд, шизофрения ва Ҳошимийлар қироллиги тахти
1951 йил 20 июлда 69 ёшли қирол Абдулла I Қуддусдаги Ал-Ақсо масжиди зинасида ўлдирилади. У Саудия Арабистонидан ҳайдалган ва диний ақидапараст бўлган 21 ёшли маҳаллий тикувчи томонидан отиб ўлдирилган отасининг қабрига 15 ёшли набираси Ҳусайн ва тансоқчилари ҳамроҳлигида намоз ўқиш учун келганди.
Абдуллоҳ I Қуддусга Исроил билан тинчлик келишувига эришиш учун келади. Бу қарорнинг кўплаб рақиблари бор эди ва натижада Иордания қироли отиб ўлдирилади. Бундан ташқари, суиқасддан сўнг соқчилар ҳимоя учун ўт очганда 22 нафар бегуноҳ одам ҳалок бўлади.
Ёш Ҳусайн мўжизавий тарзда омон қолади — ўқ унинг медалига тегади.
Иордания қироли Абдулла I вафотидан сўнг, унинг 43 ёшли ўғли Талал давлат раҳбари бўлади. Аммо унинг ҳукмронлиги узоққа бормайди. 11 ойдан кейин Талал тахтдан воз кечади.
Сабаби жуда ачинарли эди: қирол шизофрения билан оғриган, асабийлашиш эса касалликни янада кучайтирган. 1952 йил август ойида парламент Талалнинг истеъфосини талаб қилади ва унинг ўрнига унинг 16 ёшли ўғли Ҳусайн келади. Талал яна 20 йил яшайди ва Истанбулдаги руҳий касаллар санаторийсида вафот этади.
Қирол Ҳусайннинг буюк севгиси
Келишган ва ўқимишли Ҳусайн I ҳақиқий севгини учинчи марта — аристократ Алия Баҳоудин Туканга уйланганида билади. Эр-хотиннинг бир ўғли ва бир қизи (исёнкор малика Хая бинту ал Ҳусайн, шафқатсиз Шайх Мактумнинг қочиб кетган собиқ хотини) бор эди; улар шаҳзода ва малика билан саройда ўсган фаластинлик етим қиз Абирни ҳам асраб олишади. Алияни ҳамма яхши кўрарди, шу жумладан, эрининг олдинги турмушдаги фарзандлари ҳам. Айтганча, бўлажак қирол Абдулла II Ҳусайннинг инглиз аёл Антуанетта Аврил Гардинер билан бўлган иккинчи никоҳидан туғилган.
Аввалига ҳаммаси ажойиб эди, лекин бу буюк севгини катта фожиа кутаётганини ҳеч ким билмасди. Тўйдан 5 йил ўтиб, 28 ёшли Алия Аммонда авиаҳалокатда вафот этади.
1983 йилда янги Аммон аэропортига унинг номи берилади. Ҳусайн кейинчалик тўртинчи марта америкалик Лиза Нажиб Халабийга уйланиб, яна тўрт марта ота бўлган бўлса-да, бу йўқотишдан ўзига келолмайди.
Абдуллахон II ва унинг ўгай укаси ўртасидаги кескин зиддият
Қиролича Нур номи билан ҳам танилган Лиза Нажиб Ҳалабийнинг ўғли Ҳамза ўгай акаси билан яхши муносабатда эди. 1999 йилда Абдулла II Иордания подшоҳи бўлгач, отаси Ҳусайннинг илтимосига кўра Ҳамзани меросхўр этиб тайинлайди.
Бироқ Ҳамза давлат тўнтариши уюштирмоқчи экани маълум бўлгач, 2004 йилда бу қарор бекор қилинади.
Шунга қарамай, Абдулла II ўгай укасини узоқ йиллар давомида давлат имтиёзларидан чекламайди ва муносабатларни яхшилашга ҳаракат қилишни тўхтатмайди. Аммо можаронинг илдизи жуда чуқур эди: 2022 йилда 42 ёшли Ҳамза “унинг шахсий қадриятлари Иордания қироллик оиласининг қадриятларига тўғри келмагани учун” барча унвонлардан воз кечишга тайёрлигини эълон қилади.
Абдулла II бундай ёмон муносабатда айтилган гапдан жаҳли чиқиб, Ҳамзани ҳақиқатан уй қамоғига ўтказиб, мамлакатдан чиқиб кетишини ман этади. “Ўзини бир вақтнинг ўзида қаҳрамон ва қурбон деб биладиган одам билан муомала қилиш қийин, — деб тушунтиради қирол халққа йўллаган мактубида. — Биз Ҳамзага фаровон ҳаёт учун керак бўлган ҳамма нарсани берамиз, лекин у бир вақтлар миллатни, унинг қонунларини ва оиласини ҳақорат қилиш ёки Иордания барқарорлигига путур етказиш учун суиистеъмол қилган мавқейига эга бўлмайди”.
Ҳозирда унинг катта ўғли Ҳусайн Абдулла II нинг расмий вориси этиб тайинланган. Ва қирол ўз фикрини ўзгартириши даргумон.
Изоҳ (0)