Исроил мудофаа армияси Ливаннинг “Ҳизбуллоҳ” гуруҳига қарши қуруқликдан операцияга тайёрланмоқда. Бу ҳақда армия бош штаби бошлиғи Герси Халеви маълум қилди.
У еттинчи зирҳли танк бригадаси ҳарбий хизматчиларига мурожаат қилиб, “уларнинг этиклари душман ҳудудига қадам босиши”ни айтди.
Юқорида самолётларнинг овозини эшитяпсизми? Биз кун бўйи ҳужум қиляпмиз — ҳам ҳудудни эҳтимолий босқинга тайёрлаш, ҳам “Ҳизбуллоҳ”га зарба беришни давом эттириш учун, деди Халеви.
Унинг баёноти Ливанга қуруқликдан ҳужумни тақлид қилувчи ҳарбий машқларда янграган. Исроил бош штаби қўмондони, шунингдек, Ливандан Тель-Авивга баллистик ракета учирилишига “жуда кучли жавоб” беришни ваъда қилган.
Ўз навбатида, Исроил бош вазири Биньямин Нетаньяху Ливан билан чегарадош ҳудудлардан эвакуация қилинган ўн минглаб исроилликлар ўз уйларига қайтиши мумкинлигини айтди.
Вашингтоннинг фикрича, Исроилнинг Ливандаги қуруқликдаги операциясининг олдини олиш мумкин. Шу билан бирга, АҚШ президенти Жо Байден Яқин Шарқда кенг кўламли урушни истисно қилмади.
Бу минтақада кенг кўламли уруш бўлиши мумкин, аммо Исроилнинг “Ҳизбуллоҳ” ва ҲАМАС гуруҳи билан конфликтни ҳал қилиш имконияти ҳам мавжуд, деди у.
Европа давлатлари (Португалия, Дания, Испания, Франция ва Буюк Британия) расмийлари Исроил ва “Ҳизбуллоҳ” ўртасидаги жанговар ҳаракатлар кучайиши фонида ўз фуқароларини Ливанни зудлик билан тарк этишга чақирмоқда. Қирғизистон фуқароларини мазкур икки давлатга бормасликни сўраган. Ўзбекистон эса шахсий хавфсизлик чораларини кўриш, зарурат бўлмаса, кўнгилочар муассасаларга бормаслик ва ракета ҳужуми вақтида бошпаналарни тарк этмасликка чақирган.
Изоҳ (0)