Исроилнинг 24 сентябрь куни Байрутга берган зарбалари оқибатида Ливандаги “Ҳизбуллоҳ” гуруҳининг юқори мартабали қўмондони Иброҳим Муҳаммад Қубайси ҳалок бўлди.
“Ҳизбуллоҳ” қўмондон ўлимини тасдиқлади. Қубайси зенит-ракета бўлинмасига раҳбарлик қилган. Бундан ташқари, яна бир қўмондон Ҳусайн Ҳани Изаддин ҳам ҳалок бўлган. Ливан гуруҳи ҳисоботида бошқа жангчиларининг ўлими ҳақида ҳеч қандай баёнот берилмаган.
Исроил армиясига кўра, Қубайси 1980 йилларда “Ҳизбуллоҳ”га қўшилган. У хизмати давомида турли лавозимларда ишлаган, жумладан, Ливандаги оператив бўлинма катта офицери вазифасини бажарган, жанубий фронтдаги “Бадр” бўлинмасига ҳам қўмондонлик қилган.
20 сентябрь куни Исроил армиясининг Байрутга “мақсадли ҳужуми” оқибатида “Ҳизбуллоҳ”нинг Иброҳим Оқил исмли қўмондони ҳалок бўлганди. Ўшанда “Ҳизбуллоҳ”нинг ал-Ҳаж Радван кучларига (Ливан гуруҳи таркибидаги махсус бўлинма) тегишли бошқа юқори мартабали етакчилари ҳам ўлган.
17 сентябрь куни бутун Ливан бўйлаб минглаб “Ҳизбуллоҳ” пейжерлари портлагани, 18 сентябрь куни эса бошқа алоқа қурилмалари портлагани ҳақида хабар берилганди. Ҳодисалар оқибатида 37 киши ҳалок бўлган, 2600 дан ортиқ киши жароҳатланган.
Изоҳ (0)