Исроил мудофаа вазири Йоав Галлант Ливан билан шимолий чегарага янги кучлар жойлаштирилаётгани, у ерда “урушнинг янги босқичи” бошланаётганини айтди. Бу ҳақда The Times of Israel хабар берди.
“Оғирлик маркази шимолга кўчмоқда. Биз куч, ресурс ва энергияни шимолга йўналтирмоқдамиз”, деди Исроил мудофаа вазири ҳарбийлар билан учрашувда.
Унинг таъкидлашича, мамлакатнинг шимолдаги урушдаги мақсадлари “аниқ ва оддий”: шимолий шаҳарлар аҳолисининг ўз уйларига хавфсиз қайтишини таъминлаш. Галант ҳукумат ҲАМАС томонидан гаровга олинганларни унутмаслиги ва мураккаб вазиятга қарамай жанубдаги вазифаларни бажаришда давом этишини айтди.
“Бу бизнинг бурчимиз ва биз уни бир вақтнинг ўзида бажармоқдамиз”, дея қўшимча қилди у.
Исроил бош вазири Биньямин Нетаньяху ҳам қисқа видеомурожаат эълон қилиб, эвакуация қилинган шимол аҳолиси ўз уйларига қайтарилишини айтди.
Исроилнинг Ливандаги “операцияси”
17 сентябрь куни Ливанда “Ҳизбуллоҳ” гуруҳи аъзолари фойдаланаётган пейжерларнинг портлашлари қайд этилди, оқибатда 4000 дан ортиқ киши жароҳатланди, 12 киши ҳалок бўлди. Ташкилот бунинг учун жавобгарликни Исроилга юклади, яҳудий давлати расмийлари портлашлар ҳақидаги хабарларга изоҳ бермаяпти.
Манбаларга кўра, Исроилнинг “Моссад” разведка агентлиги “Ҳизбуллоҳ” учун мўлжалланган пейжерлар портлатилишидан олдин уларни қўлга киритиб, батареяларига PETН портловчи моддаларини ўрнатган ва уларни масофадан туриб ҳароратини кўтарган. Бу эса пейжерларнинг портлашига сабаб бўлган.
18 сентябрь куни Ливанда портлашларнинг иккинчи тўлқини содир бўлган, бу бошқа алоқа қурилмаларига, хусусан, портетив радиоприёмникларга таъсир қилган. Камида 300 киши яраланиб, тўққиз киши ҳалок бўлган.
Изоҳ (0)