АҚШ Савдо вазирлиги миллий хавфсизлик нуқтаи назаридан интернетга уланган автомобилларда Хитой дастурий таъминотидан фойдаланишни тақиқлаш ниятида эканини маълум қилди.
Қайд этилишича, жорий йил февраль ойида Оқ уй мазкур масалада текширув ўтказишни буюрган. Текширувлар натижасида Хитой автомобиль тизимида ўрнатилган дастурий таъминотдан фойдаланган ҳолда америкалик ҳайдовчилар ва инфратузилма ҳақида маълумотлар тўплагани аниқланган. Шунингдек, автомобиллар ва улардаги навигация тизими орқали Хитой манипуляция қилиши мумкинлигидан хавотир билдирилган.
Қарор деярли барча Хитой автомашиналарнинг Америка бозорига киришини амалда тақиқлайди ва хитойлик автомобиль ишлаб чиқарувчиларнинг АҚШ йўлларида ўзи бошқариладиган автомобилларни синовдан ўтказишига тўсқинлик қилади.
Маълумотларга кўра, таклиф 2027 йилдан дастурий таъминотни тақиқлашни кўзда тутади. Қарор келаси йилнинг 20 январигача тасдиқланиши кутилмоқда.
Сентябрь бошида Вашингтон маъмурияти Хитой электромобиллари ва улар учун аккумуляторларга юқори божхона тўловларини жорий қилган эди.
Изоҳ (0)