Россияда собиқ “замминистр” ҳисобида 329 минг доллардан ортиқ пул аниқланди

Россияда фирибгарликда айбланаётган мудофаа вазири собиқ ўринбосари Павел Поповнинг ҳисобларида 30 миллион рублдан ортиқ маблағ аниқланди. 

Тегишли сумма Россия Тергов қўмитаси Бош ҳарбий тергов бошқармаси терговчилари томонидан аниқланган. Бунгача унинг 500 миллион рублли ( 5 миллион 507 минг доллар) мулки топилганди. Попов 17 май куни ҳибсга олиниб, икки ойдан кейин уй қамоғига ўтказилганди.

Унга мансаб сохтакорлиги (Жиноят кодексининг 292-моддаси 2-қисми) ва ўта йирик миқдорда фирибгарлик (Жиноят кодексининг 159-моддаси 4-қисми) бўйича айбловлар қўйилган. Тергов маълумотларига кўра, у 130 миллион рубль (1 миллион 498 минг доллар) қийматидаги 1,7 минг тоннадан ортиқ металл маҳсулотларини ўғирлашда иштирок этган.

Россия Тергов қўмитаси 4 сентябрь куни Поповга “фирибгарлик” моддаси бўйича айблов эълон қилган. Собиқ вазир ўринбосари ўз айбини тан олмаган, кўрсатма беришдан бош тортган ва тергов билан ҳамкорлик қилишни хоҳламаган.