Хитой ҳукумати Россия бозорига сармоя киритиш ва у ерда заводлар қуришни режалаштирган автомобиль ишлаб чиқарувчилари учун янги чекловлар жорий этди. Бу ҳақда The Moscow Times хабар берди.
Маълум қилинишича, қарорга бир қатор омиллар, жумладан, Россиядаги иқтисодий беқарорлик, халқаро сиёсатдаги ноаниқлик ва санкциялар шароитида бизнес учун потенциал хатарлар сабаб бўлган. Мутахассислар тақиқ Россия ҳукуматининг автомобиль саноатини ривожлантириш ва Хитой билан иқтисодий алоқаларни мустаҳкамлаш режаларига таъсир ўтказишини айтмоқда. Соҳада Хитой инвестициялари ҳамда технологияларига умид қилган Россия янги қийинчиликларга дуч келиши мумкин.
Тақиқ сабабларидан бири, агар Россия иқтисодиёти навбатдаги санкциялар ёки иқтисодий зарбаларга дуч келса, Хитойнинг ўз стратегик манфаатларига таъсир қилишидан хавотирланиши бўлиши мумкин. Бундан ташқари, Хитойнинг беқарор халқаро вазият ва Россия иқтисодиётидаги ноаниқлик шароитида ўз хатарларини камайтиришга бўлган интилиши ҳамдир, дейилади хабарда.
Россия расмийлари ва ишбилармонлари ҳам ушбу қарорнинг мамлакат автомобиль саноати учун эҳтимолий оқибатларидан хавотирда.
Шу билан бирга, Хитой автоконцернлари Россия бозорида автомобиллар, эҳтиёт қисмлар ва технологияларни етказиб бериш каби бошқа шаклларда фаол бўлиб қолмоқда. Бироқ, янги заводлар ва ишлаб чиқариш қувватларининг йўқлиги соҳанинг ривожланишини секинлаштириши ва Россияда узоқ муддатли режаларга таъсир қилиши мумкин.
Ушбу вазият халқаро иқтисодий алоқаларнинг мураккаблиги ва кўп қирралигини, шунингдек, ўзгариб бораётган глобал шароитда Россия ва Хитой янги ҳамкорлик йўлларини излаш зарурлигини яққол кўрсатиб турибди, дейилади хабарда.
Изоҳ (0)