Бугун Стратегик ислоҳотлар агентлиги ва Германия халқаро ҳамкорлик жамияти ҳамкорлигида “Давлат хизматида стратегик режалаштириш: самарадорликни ошириш йўллари” мавзусида семинар бўлиб ўтди.
![](/static/2024/09/11/photo_2024-09-11_11-27-53-2w_wacv5.jpg)
Тадбир Стратегик ислоҳотлар агентлиги директорининг биринчи ўринбосари Абдулла Абдуқодиров, махсус атташе Иева Яунземе, Латвиянинг Фавқулодда ва Мухтор Элчиси Рейнис Трокша ва GIZ дастури менежери Виктор Кесслерлар қатнашди.
Абдулла Абдуқодиров тадбирнинг аҳамияти ҳақида гапирар экан, Ўзбекистонда вазирлик ва идоралар томонидан турли соҳалар кесимида 62 та стратегиялар ишлаб чиқилгани, аммо бу стратегияларнинг баъзилари “Ўзбекистон—2030” стратегиясига умуман тўғри келмаслигини таъкидлади.
“Нима учун бугун стратегик режалаштириш бир долзарб муаммога айланди? Чунки шу кунгача 62 та соҳада турли стратегик хужжатлар ишлаб чиқилган. Бироқ бу стратегик хужжатлар “Ўзбекистон—2030” стратегиясига умуман мос келмайди. Стратегик ислоҳотлар агентлиги стратегияни тузиш борасида қўлланма ишлаб чиққан. Ҳозир шу қўлланма президенти фармони асосида вазирлик ва идоралар билан келишилган ҳолда амалиётга тадбиқ этиш масаласи кўтарилмоқда”, – дейди Стратегик ислоҳотлар агентлиги директорининг биринчи ўринбосари.
![](/static/2024/09/11/photo_2024-09-11_11-27-58-JUHhv3do.jpg)
Шунингдек, Абдуқодиров ишлаб чиқилаётган стратегиялар нима учун фақат қоғозда қуруқ гап бўлиб қолиб кетаётгани ҳақида гапирди.
“Стратегия – инсон ҳаёти вас ҳу ҳаёт давомида эришиладиган қадриятларга йўналтирилган бўлиши керак. Яъни биз 15 йилдан кейин қайси муҳитда яшамоқчимиз, деган саволга жавоб бўлиши керак. Гап бу ерда инсонга бериладиган турли эркинлик ва қулайлик ҳақида. Энг қийин масала – бу қадриятларни турли кўрсаткичларга трансформация қилиш. Ундан кейин бунга ресрус топиш керак. Давлат идоралари томонидан 62 та ишлаб чиқилган стратегиядан 38 тасида ҳеч қандай кўрсаткичлар белгиланмаган. Мақсадлари жуда катта, лекин бу мақсадларга қандай кўрсаткичлар орқали эришилиши ҳақида ҳеч қандай гап йўқ. Кўрсаткичлар ўлчанилмаганидан кейин бу стратегияни режалаштириб бўлмайди. Режалаштириб бўлмаган нарсани молиялаштириб бўлмайди! Яъни кўрсаткичлари бўлмаган стратегиялар фақат гап бўлиб қолиб кетади”, деди у.
Изоҳ (0)