Коррупция бор жойда ҳамма ютқазади ёки жуда камчилик ютиб, катта қисм мағлуб бўлади. Бу ҳақда 10 сентябрь куни Тошкент шаҳрида бўлиб ўтган аксилкоррупция соҳасида Халқаро медиа форумида Европа Иттифоқининг Ўзбекистондаги делегацияси ҳамкорлик бўлими бошлиғи Вим Риэпма айтиб ўтди, дея хабар бермоқда “Дарё” мухбири.
Жаноб Вим Риэпманинг айтишича, медиа коррупция ҳолатларини юзага чиқариши мумкин. Масалан, улар коррупция ҳолатларини аниқлаб, нима бўлаётганини аҳолига тушунтириб беради.
Иккинчидан, коррупцияга қарши кураш сиз, мен, барчамиздан бошланади. Чунки биз кундалик турмушимизда коррупцияга олиб келувчи ҳолатлар билан тўқнаш келамиз мумкин. Масалан, шифохонага ёки таълим даргоҳларига борганимизда биздан пул сўрашлари ёки менинг эгаллаб турган лавозимимдан кимгадир пул ундириш учун фойдаланиши мумкин. Бундай пайтда менда улар юрган йўлдан юриш ёки коррупцияга йўқ дейиш қарорини қабул қилиш қолади. Айнан ушбу ҳолатларда медианинг роли ортади. Улар айнан коррупциянинг хавфи ҳақида одамларга тушунча бериши керак, деди Жаноб Вим Риэпма.
Европа Иттифоқи масъулининг алоҳида таъкидлашича, коррупция бор жойда ҳамма ютқазади ёки жуда камчилик ютиб, катта қисм мағлуб бўлади.
Кўпчилик камбағаллашади, кам қисм эса бойиб кетиши мумкин. Йўқотиш фақат пул кўринишида эмас, ҳаёт ёки соғлиқ билан ҳам бўлади.
Агар тўғри даволанолмасангиз, уйингиз турли бахтсиз ҳодисаларга бардошли қилиб қурилмаган бўлса, дорихонадан оладиган дорингиз сифатсиз бўлса (болалар ўлимига сабаб бўлган шамоллашга қарши қўлланилган дори мисолида), бу ҳаётингизга таъсир қилади. Айнан мана шу коррупциянинг оқибатлари ҳисобланади.
Коррупцияга қарши курашувчиларнинг сафида бўлинг. Ўзингиз ва давлатингиз учун коррупцияга қарши курашинг, дейди у.
Мазкур форумда иштирок этган Коррупцияга қарши курашиш агентлиги директори Акмал Бурхонов коррупцияга қарши курашишда ОАВ ва журналистлар имкониятларидан кенгроқ фойдаланиш мақсадида улар турли аксилкоррупция тузилмалари фаолиятига жалб қилинганини айтиб ўтган эди.
Изоҳ (0)