Myunxen markazida 5-sentyabr kuni ertalab otishma sodir bo‘ldi. Bu haqda Bavariya poytaxti politsiyasiga tayanib Deutsche Welle xabar berdi.
Qayd etilishicha, politsiya voqea joyiga – shahar markazidagi Milliy sotsializm tarixini hujjatlashtirish markaziga zobitlarni yuborgan. Isroil Bosh konsulligi ushbu markaz yaqinida joylashgan.
“Karolinenplats hududida politsiya shubhali shaxsga qarata o‘t ochdi, u yaralandi”, deb yozadi Myunxen politsiyasi X ijtimoiy tarmog‘ida.
Voqea sodir bo‘lgan joy o‘rab olingan. Bild’ning ta’kidlashicha, gumonlanuvchi uzun stvolli qurol bilan qurollangan. Erkak mashinasini Hujjatlar markaziga haydab, bino oldida joylashgan politsiya postiga qarata o‘t ochgan. Politsiya xodimi javoban o‘q uzgan. Politsiya matbuot xizmati xodimlari yonida o‘qotar qurol bo‘lgan erkakni payqashganini ma’lum qilgan. Politsiya o‘z xizmat qurollarini qo‘llagan, o‘q erkakka tegib, uni yaralagan.
Politsiya hodisa bilan bog‘liq boshqa shubhali shaxslar borligi haqida ma’lumotga ega emasligini bildirgan. Potensial guvohlardan voqea joyida olingan fotosuratlar va videolarni maxsus portalga yuklash yoki tergovga yordam berish uchun eng yaqin politsiya bo‘limiga berish so‘ralgan. Shu bilan birga, politsiya fuqarolarni voqea joyidan olingan surat va videolarni ijtimoiy tarmoqlarda tarqatmaslikka chaqirgan.
Myunxen xavfsizlik konferensiyasi vakiliga ko‘ra, ertalab soat 9:10 atrofida kamida o‘nlab o‘q ovozlari eshitilgan. Voqea joyida politsiya kuchaytirilgan tartibda ishlamoqda.
Isroil TIV Myunxendagi Bosh konsulligi xodimlari jabrlanmaganligini ma’lum qilgan.
Izoh (0)