Бухорода икки фарзанди бор маҳкуманинг озодликдан маҳрум этиш жазоси уй қамоғига алмаштирилди

Бухоро вилоятида икки фарзанди бор маҳкуманинг озодликдан маҳрум этиш жазоси уй қамоғига алмаштирилди. Бу ҳақда омбудсман хабар берди. 

Қайд этилишича, Олий Мажлисининг инсон ҳуқуқлари бўйича вакили (омбудсман)нинг Бухоро вилоятидаги минтақавий вакили А.Хусейнова 4-сонли тергов ҳибсхонасига амалга оширган мониторинг ташрифида ушбу муассасада сақланаётган аёл мурожаати якка тартибда қабул қилинган эди.

Суҳбат жараёнида аёл вояга етмаган икки нафар фарзанди қаровсиз қолгани, кўрсатилган моддий зарар унинг отаси томонидан қоплангани, яқинда апелляция суди бўлишини айтиб, минтақавий вакилдан қонун доирасида ёрдам беришни ва суд мажлисида иштирок этишини сўраб мурожаат қилган.

А.О.нинг аризасига биноан омбудсман минтақавий вакили суд жараёнларида иштирок этди. Суд ҳайъати томонидан минтақавий вакилнинг илтимосномаси инобатга олиниб, аёлнинг озодликдан маҳрум этиш жазосини озодликни чеклаш жазосига алмаштирди, суд залида қамоқдан озод этилди, жазонинг қолган қисмини уй қамоғига алмаштиришга қарор қилинди.