Беларусь президенти Александр Лукашенко Беларусдан ташқарида жангга боришга буйруқ бермаганини ва бермаслигини маълум қилди.
“Жаҳон ОАВларидан: “Ҳа, Лукашенко ундай, бундай. Эртага у буйруқ беради, у ерга боришади” деган шарҳларни ўқиб, ўзимни ёмон ҳис қиламан” дейди у.
Унинг таъкидлашича, мамлакат чегарасидан ташқарида жанг қилиш бўйича ҳеч қандай буйруқ бўлмаган ва бўлмайди ҳам.
“Бизга ёмон ният билан келганларидагина урушамиз. Ҳаммаси шу”, дея қўшимча қилган Лукашенко.
Россия-Украина уруши бошланганидан кейин Лукашенко бир неча бор Беларусь армияси ҳарбий амалиётда иштирок этмаётганини айтиб, Минскдан ҳужум бўлишини истисно қилган. Шунга қарамай, Беларусь қўшинларининг чегарада гуруҳланиши кучайтирилган.
Жорий йилнинг 13 июлида Лукашенко Беларусь-Украина чегарасида энди кескинлик йўқлигини маълум қилган ва у ердан қўшинларни олиб чиқишни буюрган.
6 август куни Украина армиясининг Россиянинг Курск вилоятига ҳужумидан сўнг Лукашенко яна Украина чегарасига қўшин киритишни буюрган эди. Чегара ҳудудларига ҳарбий қисмлар, махсус операция кучлари, “Полонез” ракета тизимлари ва “Искандар” мажмуалари тўплана бошланган.
25 август куни Украина ТИВ Минскдан “дўстона бўлмаган ҳаракатларни тўхтатишни ва қўшинларни Украина давлат чегарасидан узоқроқ масофага олиб чиқишни” талаб қилган.
Изоҳ (0)