Россия томонидан 90 нафардан ортиқ ҳиндистонлик Украинага алдов йўли билан урушга юборилган, улардан камида саккиз нафари ҳалок бўлган ва уларнинг жасадлари ҳали ҳам ўз ватанларига қайтарилмаган. Бу ҳақда “Дожд” телеканали Ҳиндистон парламентига таяниб хабар берди.
Ҳиндистон парламенти депутати Викрамжит Сингх Саҳнейб сўзларига кўра, Украина билан урушга юборилаётган Ҳиндистон фуқароларининг аксарияти иш билан таъминлаш баҳонасида Россияга таклиф қилиниб, кейин эса таржимонларсиз Россия Мудофаа вазирлиги билан шартнома имзолашга мажбур қилинмоқда. Унинг фикрича, одамлар кўпинча уруш ҳудудига етиб борганидан кейингина фронтга етганликларини тушунмоқда.
Телеканал Украинада ўлдирилган ҳиндистонликлардан бири Рави Муннинг ота-онаси билан боғланганда, улар ўғлига Россия транспорт компанияларидан бирига жойлаштиришга ваъда берилганини айтишган. Бироқ Россияга келганидан сўнг Мун оиласи билан фронтда алоқага чиққан.
Июль ойида Ҳиндистон бош вазири Нарендра Моди Москвага ташрифи ва Россия президенти Владимир Путин билан учрашуви чоғида Россия Мудофаа вазирлиги билан шартнома имзолаган ҳиндистонликларни демобилизация қилиш ва янги ёлланмаларнинг олдини олиш борасида саволларни кўтарган эди.
“Путин ҳар икки масалани ҳал қилишда ёрдам беришга ваъда берган, бироқ бу ҳали Украинада жанг қилаётган ҳиндларнинг аҳволига таъсир қилмади”, дея таъкидлайди телеканал.
Изоҳ (0)