Лукаку “Наполи”га, Кьеза эса “Ливерпуль”га ўтди. Европа трансферлар ойнасидаги сўнгги янгиликлар

Европада трансферлар бозори қайнамоқда. 29 август кунида ҳам бир қанча трансферлар амалга оширилди.

Ромелу Лукаку — “Челси”дан “Наполи”га

“Челси” ҳужумчиси Ромелу Лукаку “Наполи” сафига бориб қўшилди. Бельгиялик ҳужумчи янги жамоаси билан 2027 йилгача мўлжалланган шартнома имзолади. Неаполликлар Лукаку учун 30 миллион евро ҳамда қўшимча бонуслар тўлаб беради. 

Федерико Кьеза — “Ювентус”дан “Ливерпуль”га

26 ёшли италиялик футболчи фаолиятини “қизиллар” клубида давом эттиради. Мерсисайдликлар Кьеза учун 13 миллион евро тўлаб беради. 

Аввалроқ Федерикога Каталониянинг “Барселона”си ҳам қизиқаётгани хабар қилинганди. Бироқ “кўк-анорранглилар” ушбу трансфер бўйича “Ливерпуль”га имкониятни бой берди.

Кепа Аррисабалага — “Челси”дан “Борнмут”га (ижара асосида)

“Борнмут” 29 ёшли дарвозабонни бир мавсумга ижарага олганини эълон қилди. Кепа ўтган мавсум “Реал” сафида ижара асосида ўйнаган эди ва Ла Лига доирасида 14 та ўйинда майдонга тушган.

Тино Анжорин — “Челси”дан “Эмполи”га

Лондон клуби ярим ҳимоячининг италян клубига ўтганини маълум қилди. “Челси” футболчининг кейинги трансферидан 50% ҳуқуқини ўзида сақлаб қолди.

22 ёшли Анжорин ўтган мавсумни “Порцмут” сафида ижара асосида ўтказган ва 12 та ўйинда битта голга муаллифлик қилган.

Каталониянинг “Барселона” жамоаси ёзда йирик трансферларни амалга ошира олмайди. Marca нашрининг хабарига кўра, каталонияликлар “Атлетик” аъзоси Нико Уильямсни ҳам, “Милан” ҳужумчиси Рафаэл Леауни ҳам сотиб ололмайди. 

“Кўк-анорранглилар” Nike билан музокараларни деярли якунига етказди. Бироқ, ҳамкорлик тўғрисида сентябрь бошларида эълон қилинади. Шунинг учун август ойи охирига қадар “Барселона” трансферларни амалга оширишга улгурмайди.