Россия армияси 23 июль куни “Ярс” баллистик ракеталари иштирокида ҳарбий машғулотлар бошлаган. Бу ҳақда Россия Мудофаа вазирлиги хабар берди.
Россия Мудофаа вазирлиги ушбу маълумотни тасдиқлаган. Машғулотларда ҳарбий хизматчилар интенсив манёвр ҳаракатларини амалга ошираётгани, жумладан, ўрмон зоналарида баллистик ракеталар ўрнатмаларининг яширинлигини оширишга қаратилган вазифаларни бажариш тадбирлари ўтказилаётгани хабар қилинган.
Манбада айтилишича, “Ярс” қитъалараро баллистик ракеталари ядровий юк ва каллакни ташишга қодир ўта ўғир қурол ҳисобланади. У 10 минг километрдан узоқ масофаларга учиб, ўта аниқликда зарба бера олади.
Ҳозирги ўтказилаётган машқлар умумий ҳарбий машғулот компаниясининг иккинчи босқичи эканлиги айтилган. Биринчи босқич тадбирлар жорий йилнинг 5 июль куни ўтказилган эди.
Сўнгги пайтларда Россия ядро қуролидан фойдаланиш билан боғлиқ ҳарбий машғулотлар сонини нисбатан кўпайтирган. Уларнинг айримларида қўшни Беларусь ҳарбийлари ҳам иштирок этган. Бу каби тадбирлар Ғарбнинг эътирози ва хавотирларига сабаб бўлмоқда.
Ўтган ойда Россия ва Беларусь ўртасидаги қўшма ностратегик ядровий машғулотлар НАТО чегараси ва Польша яқинида амалга оширилган эди. НАТО раҳбарияти бу ҳаракатни кескин провокация деб баҳолаб, Россияни машқларни тўхтатишга чақирган.
Изоҳ (0)