Тибо Куртуа Бельгия терма жамоасида маълум муддат ўйнамаслигини маълум қилди

Бельгиялик дарвозабон Тибо Куртуа Доменико Тедеско бошчилигидаги терма жамоада ўйнамаслигини маълум қилди.

Ўтган йилнинг июнь ойида голкипер ва терма жамоа бош мураббийи ўртасида низо келиб чиққан эди ва натижада Куртуа терма жамоа базасини тарк этганди. 

“Бельгияликлар ва терма жамоамизнинг мухлисларига мурожаат қилмоқчиман. Мамлакатим шарафини майдонда ҳимоя қилаётганимдан фахрланаман. Миллий жамоа либосини кийиш улкан шараф. Уни 100 марта кийишни тасаввур ҳам қилолмайман.

Афсуски, мураббий билан суҳбатлашгач, унинг қўл остидаги Бельгия терма жамоасига ортиқ қайтмасликка қарор қилдим. Бу жавоб учун тўлиқ масъулиятни ўз зиммамга оламан. 

Менинг бу қароримни эшитган Федерация буни оғриқли қабул қилди, лекин тушунди. Баъзи мухлисларнинг ҳафсаласи пир бўлганини тушуниб турибман, лекин бу терма жамоа учун фойдали бўлади. Чунки бу ўзаро баҳсларни якунлайди ва жамоа ўз мақсадларига эришишга эътибор қаратишига имкон беради. 

Доимий қўллаб-қувватлаганингиз, тушунганингиз учун раҳмат”, — деб ёзади “Реал” ва Бельгия терма жамоаси дарвозабони. 

Тибо Куртуа 2011 йилдан буён Бельгия терма жамоаси шарафини ҳимоя қилиб келмоқда. 32 ёшли посбон терма жамоа сафида 102 та ўйин ўтказиб, 79 та голни ўз дарвозасидан олиб чиққан.