Наманганда қалбаки дори воситалари тайёрлаш ва сотиш билан шуғулланганларга жазо тайинланди

Наманганда қалбаки дори воситаларини тайёрлаш ва сотиш билан шуғулланган шахслар ушлангани ҳақида хабар берилган эди. Суд ҳукми билан уларга жазо тайинланди.

30 январь куни ДХХ томонидан ўтказилган тезкор тадбирда, Чортоқ тумани тез тиббий ёрдам фелдшери ўзининг яшаш хонадонидан Cobalt’да чиқиб кетаётган вақтида тўхтатилган. Автомашинада ҳеч қандай ҳужжатлари бўлмаган 1 000 дона “Зодак” дори воситаси борлиги аниқланган.

Унинг яшаш хонадони кўздан кечирилганда, дори воситалари ишлаб чиқариш учун мўлжалланган яширин цех борлиги аниқланиб, сотиш учун тайёрлаб қўйилган 763 дона “Анаферон”, 2125 дона “Зодак”, 4000 дона “Витамин B6” дори воситалари, 570 дона номсиз флаконларда сироплар, дори препаратларини қадоқлашда фойдаланиладиган флаконлар, пластик қопқоқ ва пробкалар, дори қутилари ва йўриқномалари процессуал тартибда расмийлаштириб олинган.

Мазкур шахс дори воситаларини тайёрлаш ва сақлаш учун ўзининг 1977 йилда туғилган опасини ҳамда 1974 йилда туғилган қариндошини жалб қилган.

Тадбир давомида унинг опасининг яшаш манзилидан ҳам 120 дона “Зодак”, 260 дона “Анаферон”, 96 дона “Хилак Форте” ва 313 дона номсиз флаконларга солинган сироп ҳолидаги дори воситалари ашёвий далил сифатида олинган.

Тергов жараёнида тез ёрдам фелдшерини дори воситалари тайёрлашда керак бўладиган этикетка, флакон, қопқоқ ва пробкалар, дори қутилари ҳамда йўриқномалар билан Андижон шаҳрида яшовчи, 1991 йилда туғилган шахс таъминлаб тургани аниқланган.

Шунингдек, ушбу жиноятга алоқадор бўлган Қўқон шаҳрида истиқомат қилувчи, 1986 йилда туғилган фуқаронинг яшаш хонадонида ўтказилган тинтув-тергов ҳаракати давомида тез ёрдам фелдшеридан сотиб олинган, умумий қиймати 27 миллион 646 минг 800 сўмлик 150 дона “Зодак” ва 146 дона “Хилак Форте” дори воситалари процессуал тартибда расмийлаштириб олинган.

Тергов жараёнида қўлбола усулда тайёрланган дори воситаларининг олди-сотдисига Чортоқ туманида яшовчи, 1994 йилда туғилган, тиббиёт йўналишидаги давлат олий таълим муассасасининг талабаси ҳам алоқадор эканлиги маълум бўлган.

Яширин цех шароитида тайёрланган дори воситалари асосан Андижон ва Қўқон шаҳарларида сотувга чиқарилган.

Жиноят ишлари бўйича Янгиқўрғон туман суди томонидан мазкур шахслар Жиноят кодексининг 186-3-моддасида назарда тутилган жиноятларни содир этганликда айбдор деб топилиб, Чортоқ туман тез тиббий ёрдам фелдшери ҳамда уни хом ашё билан таъминлаб турган, Андижон шаҳрида яшовчи фуқарога 5 йил 6 ой муддатга озодликдан маҳрум қилиш жазоси тайинланди. Қолган тўрт нафар шахснинг ҳар бири 2 йил муддатга озодликдан маҳрум этилди.

Ашёвий далил сифатида олинган барча дори воситалари эса тегишли тартибда йўқ қилинди.