Ўз даврида Disney’нинг барча рекордларни янгилаган ва кўплаб актёрларга оламшумул машҳурлик келтирган “Ҳанна Монтана” сериали қаҳрамони, хонанда Майли Сайрус энг ёш Disney афсонаси деб топилди. Бу ҳақда Europa Plus хабар бермоқда.
DisneyD23 маросимида Майли Сайрус энг ёш Disney афсонаси унвонига сазовор бўлгач, кўз ёшларини тия олмади. Ушбу унвон Disney олами ривожига катта ҳисса қўшган ва ўчмас из қолдирган истеъдодларга берилади.
Сайрус 12 ёшидан бошлаб Ҳанна Монтана образини худди шу номли сериалда гавдалантирган ва 2005 йилдан 2010 йилгача мазкур ижодий тахаллуси остида қўшиқлар ижро этган.
“Қўлимдаги мукофот Ҳанна ва унинг барча ажойиб, содиқ мухлислари ҳамда менинг орзуйимни амалга оширган барча инсонларга бағишланган. Мен Ҳанна Монтана бўлганимдан фахрланаман”, деди хонанда.
Саҳнага чиқаётиб, Сайрус, албатта, “йиғлаб юборишини билар эди”. Сўнг юлдуз барча ёш истеъдодларни қўллаб-қувватлашини айтди:
“Аввало, мен барчага Disney афсоналари ҳақидаги кичик сирни очмоқчиман. Саҳна ортидаги сирларни фош қиладиган биринчи одам бўлмоқчиман. Билингки, афсонавий инсонлар ҳам қўрқувни ҳис қилади. Мен ҳозирда қўрқяпман... Қўрқиб туриб ҳам ғалаба томон интилиш энг афсонавий ишдир”, деди Сайрус.
Изоҳ (0)