Болалар омбудсманига Сурхондарё вилоятида яшовчи Ш.М. (аёл)дан мурожаат келиб тушди. Бу ҳақда Болалар омбудсмани матбуот хизмати хабар берди.
Мурожаатида Ш.М. 3 июнь куни 1992 йилда туғилган қўшниси Б.Ш. (эркак) 2014 йилда туғилган қизи Д.А.га уйида ҳеч ким йўқлигидан фойдаланиб, уятсиз қилиқлар қилиб, унинг жинсий дахлсизлигига таҳдид қилганини маълум қилган.
Ш.М. ёзишича, Б.Ш. вояга етмаган қизига агар бўлган ҳолатни кимгадир айтадиган бўлса, уни ўлдириш билан қўрқитган. Б.Ш. аёлнинг уйига кириб, қилган ишларини Ш.М.нинг қизи видеотасвирга тушириб олганини, аёл бу ҳолат юзасидан тергов органларига хабар берганини, лекин улар томонидан тегишли чора кўрилмаётганини билдириб, фарзандининг ҳуқуқларини ҳимоя қилишда ёрдам сўраган.
Болалар омбудсманининг Ички ишлар вазирлигига юборган сўрови асосида Сурхондарё вилояти ИИБ ҳузуридаги Тергов бошқармаси томонидан мазкур ҳолат юзасидан 7 июль куни Б.Ш.га нисбатан Жиноят кодексининг 129-моддаси 2-қисми “в” банди (ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилди.
Жиноят иши юзасидан 26 июль куни айбланувчи Б.Ш.га нисбатан қамоқ эҳтиёт чораси қўлланди.
Ҳозирда дастлабки тергов ҳаракатлари тамомланиб, жиноят иши материаллари тегишли судга юборилди.
Изоҳ (0)