Олий суд собиқ қишлоқ хўжалиги вазири Азиз Воитов ва бошқаларга оид жиноят ишини кўриб чиқиш бўйича очиқ суд жараёни 5 сентябрь куни бошланишини эълон қилди.
Маълум қилинишича, 15 август куни жиноят ишлари бўйича Миробод туман судининг иш юритувида бўлган Азиз Воитов ва бошқаларга ҳамда жиноят ишлари бўйича Шайхонтоҳур туман судининг иш юритувида бўлган Х.Каримов (Қишлоқ хўжалиги вазирлиги ҳузуридаги Қишлоқ хўжалигида хизматлар кўрсатиш агентлиги директори лавозимида ишлаган) ва бошқаларга оид жиноят ишларини битта иш юритувига бирлаштириш юзасидан дастлабки эшитув ўтказилди.
Дастлабки эшитув Жиноят-процессуал кодексининг 405-6-моддаси талабига мувофиқ ёпиқ суд мажлисида ўтказилиб, унинг натижаси бўйича иккита жиноят иши битта иш юритувига бирлаштирилди.
Азиз Воитов ва бошқаларга (жами 50 киши) оид жиноят ишини жиноят ишлари бўйича Миробод туман суди томонидан биринчи инстанцияда кўриб чиқиш бўйича очиқ суд жараёни 5 сентябрь куни соат 15:00 да жиноят ишлари бўйича Юнусобод туман суди биносида бошланади.
Тергов органининг айблов хулосасига кўра судланувчилар Жиноят кодексининг 167, 168, 184, 185-2, 189, 205, 206, 28,209, 209, 211, 228 ва 243-моддаларида назарда тутилган жиноятларни содир этганликда айбланмоқда.
Судланувчиларнинг 29 нафарига нисбатан қамоққа олиш, 15 нафарига гаров ва 6 нафарига муносиб хулқ-атворда бўлиш ҳақидаги тилхат тарзидаги эҳтиёт чоралари қўлланилган.
2022 йил август ойидан қишлоқ хўжалиги вазири лавозимида ишлаб келган Азиз Воитов президентнинг тегишли қарори билан 2023 йилнинг 25 октябрида лавозимидан олинганди. У иқтисодий жиноятлар билан боғлиқ иш доирасида 2023 йилнинг декабрида қамоққа олиниб, тергов ҳибсхонасига жойлаштирилди.
Изоҳ (0)