2024-yilning 12-avgust kuni zamonaviy kinoning eng ko‘zga ko‘ringan aktrisalaridan biri Maryam Uzerli 41 yoshini nishonladi. Ko‘pchilik uni “Muhtasham yuz yil” serialidagi raqiblarining fitnalariga qarshi turib, turk sultoni Sulaymonning qalbini zabt eta olgan Xurram roli orqali taniydi.
Bolaligi va yoshligi
Maryam o‘zgacha tashqi ko‘rinishining sababi bor — uning onasi nemis, otasi turk. Qiz Germaniyaning Kassel shahrida katta oilada tug‘ilgan. Besh yoshida u teatr to‘garagiga qatnasha boshlaydi va maktabdagi barcha spektakllarda ishtirok etadi.
Maktabdan so‘ng u Gamburgdagi teatr maktabiga o‘qishga kiradi. Bir muncha vaqt u mahalliy teatrda o‘ynaydi. Keyinchalik Berlinga ko‘chib o‘tadi va turli filmlar epizodlarida rol ijro etadi. Ammo oldinda uni olamshumul rol kutib turardi.
Maryam Uzerli “Muhtasham yuz yil”ga qanday kelib qolgan?
2010-yilda uning hamkasbi Maryam Uzerliga Turkiyada yirik tarixiy serial suratga olinayotgani, bosh rolga aktrisa kerakligi haqida aytadi. Suratga olish ishlariga bir necha kun qolgan edi, lekin Xurram roliga mos aktrisa topilmagandi. Maryam kastingdan muvaffaqiyatli o‘tadi, ammo barcha qiyinchiliklar oldinda edi.
Uzerli turkchani bilmas, rolini faqat yodlab olgandi. Vaziyat rejissyorning buyruqlarini tushunmaganligi sababli qiyinlashadi. Asta-sekin hammasi o‘z iziga tushadi. Maryamga suratga olish maydonchasidagi hamkasblari, jumladan ekranda unga qarshi fitna uyushtirganlar ham yordam berishadi.
Maryam Uzerli hayoti bir kechada barbod bo‘lgan Aleksandra ismli qiz rolini o‘ynaydi. Uning ota-onasi o‘ldirilgan, o‘zi esa asir olinib, Usmonli imperiyasi hukmdori sulton Sulaymon yashaydigan To‘pqopi saroyiga sotiladi.
Kuchli va temperamentli qiz haramdagi kanizaklardan biri bo‘lishni xohlamaydi. Oqibatda u Sulaymonni (Halit Ergench) sevib qoladi va sultonning qalbini zabt etib, Usmonli hukmdorining rafiqasiga aylanadi. Haramda Aleksandraga Roksolana ismi berilgan bo‘lsa, sulton Sulaymon uni Xurram deb ataydi, bu fors tilidan tarjima qilinganda “quvonch keltiruvchi" degan ma’noni anglatadi.
Bu juftlik rolini shu qadar hissiyotli va ishonchli o‘ynaydiki, tomoshabinlar ular o‘rtasidagi nimadir borligiga ishonishadi. Uzerlining so‘zlariga ko‘ra, aslida u boshqa odamni — O‘zan Guvenni (Rustam posho) yoqtirgan.
Maryam Uzerli va Halit Ergench “Muhtasham yuz yil” serialida
Aktrisa suratga olish maydonchasida kuniga 14 soatlab ishlaydi, shundan so‘ng u hissiy jihatdan charchay boshlaydi. Maryam Uzerlining o‘zi tan olganidek, qahramonning haramga kirishining birinchi epizodlarini suratga olish paytidanoq, u tom ma’noda saroy devorlari unga bosim o‘tkazayotganini his qilgan. Aktrisaning so‘zlariga ko‘ra, u ba’zida haqiqiy Maryam va ekrandagi Xurram o‘rtasidagi chegara qayerda ekanligini tushunolmagan va aqldan ozganini his qilgan.
Uzerli hamma narsadan shunchalik charchaganki, uchinchi mavsumdan keyin loyihani tark etgan. To‘rtinchisida uning o‘rnini hamkasbi Vohide Perchin egallaydi. Aktrisa hech kimga indamay, Berlinga ketib qoladi. Serial ijodkorlari undan juda g‘azablanishadi. Film prodyuseri Timur Savji aktrisa butun jamoani mavhum vaziyatda qoldirganini aytadi. Maryam serialni tark etgach, uning reytingi keskin tushib ketadi.
Shaxsiy hayoti
Biroq Uzerli hayotida boshqa muammolar ham yetarlicha edi. 2012-yilda u biznesmen Jan Ateshni sevib qoladi. Avvaliga ular o‘rtasidagi munosabatlar ertak kabi edi, lekin keyin aktrisa tushkunlikka tushib qoladi.
Maryam homilador bo‘lgach, sevgilisi unga abort qilishni taklif qiladi. Keyinchalik ma’lum bo‘lishicha, Jan Atesh Maryamni yaxshi ko‘rmagan, balki undan piar sifatida foydalanib, imkon qadar tez-tez e’tiborga tushishga harakat qilgan. 2015-yilda esa bu odam firibgarlik tufayli xalqaro qidiruvga berilgan. Shunga qaramay, bu munosabatlardan Maryam Uzerlining Lara ismli qizi dunyoga keladi.
2020-yil sentyabr oyida aktrisa ikkinchi bor homiladorligini e’lon qiladi. Uning navbatdagi sevgilisi ismi oshkor etilmagan amerikalik tadbirkor edi. U Maryam, qizi Lara va tug‘ilmagan bolasi yonida bo‘lish uchun AQSHdan ko‘chib keladi. 2021-yil 8-yanvarda Lili Koi ismli qizaloq tug‘iladi.
Afsuski, bu baxt uzoqqa cho‘zilmaydi. Amerikalik tadbirkor Germaniyada yashay olmaydi va Maryamga o‘zi bilan AQSHga ketishni taklif qiladi. Ammo Maryam rozi bo‘lmaydi va vatanida qoladi. Natijada bu nikoh ham buziladi.
“Muhtasham yuz yil”dan keyingi rollari
Maryam Uzerli “Muhtasham yuz yil”dan ketib qolganidan so‘ng, ko‘pchilik uni filmlarga taklif qilinmaydi deb o‘ylagan. Ammo bunday bo‘lmaydi.
U “Tun malikasi”, “Ona dardi”, “Mafiya dunyoni boshqara olmaydi” va boshqa seriallarda ishtirok etadi. 2023-yilda aktrisa asosiy rollardan birini o‘ynagan “Ru” mini-seriali chiqadi. Shunday qilib, hozirda u ijodi va qizlaridan zavqlanib, xotirjam hayot kechirmoqda.
Izoh (0)