Noroziliklar ortidan isteʼfoga chiqib, xorijga qochgan Bangladeshning sobiq bosh vaziri Shayx Hasina yana mamlakatga qaytishini maʼlum qilgan. Bu haqda Shayx Hasinaning o‘g‘li bergan maʼlumotga asoslanib, Reuters nashri xabar berdi.
![](/static/2024/08/09/reuters1-8-fCmukh.jpg)
Manbada aytilishicha, Shayx Hasina yangi muvaqqat hukumat saylovlari o‘tkazilishi eʼlon qilingach, mamlakatga qaytish qaroriga kelgan. Sobiq bosh vazirning ortga qaytishdan maqsadi siyosiy rahbariyatga qaytish yoki boshqa ekanligi hozircha aniq emas.
Bangladeshda bir necha hafta davom etgan norozilik namoyishlari ortidan Hasina xonim 5-avgust kuni Hindistonga qochib ketgan edi. Shundan so‘ng esa mamlakatning ilg‘or elitasi va namoyishchilar tinchlik bo‘yicha Nobel mukofoti sovrindori Muhammad Yunusni Dakkaga chaqirib, u boshchiligida muvaqqat hukumat tuzgan.
Muhammad Yunus vaqtinchalik vazifaga kirishish oldidan xalq oldida rasman qasamyod qilgan. Unga saylovlarni o‘tkazish va bosh vazir sifatidagi vazifalarni bajarib turish topshirilgan.
Shayx Hasinaning AQSHda istiqomat qiluvchi o‘g‘li Sajib Vazid muvaqqat hukumat saylovlar haqida qaror qabul qilsa, Shayx Hasina Dakkaga qaytishini bildirgan. Hozirda Hasina xonim Hindistonda ekani va yurtiga qaytishga tayyorgarlik ko‘rayotgani xabar berilgan.
“Hozircha u (Shayx Hasina) Hindistonda. Muvaqqat hukumat qaror qabul qilgan paytda u Bangladeshga qaytadi”, — deya maʼlum qilgan Sajid Vazid.
Bangladeshdagi bir guruh siyosat arboblari Shayx Hasinaning mamlakatga qaytishi xavfli ekanini bildirgan. Chunki 76 yoshli sobiq rahbarga nisbatan mamlakatning ko‘plab hududlarida nafrat kuchayib ketgan. Fuqarolar uning umrbod mamlakatga qaytmasligini talab qilishmoqda.
Maʼlumot o‘rnida, Bangladeshda adolatsiz mehnat kvotasiga eʼtirozdan boshlangan g‘alayonlar oqibatida hozirga qadar 400 dan ortiq fuqaro halok bo‘lgan. Shayx Hasina hukumati muvaffaqiyatsizligi ortidan uning “Avami ligasi” partiyasi ham kutilmagan yo‘qotishlarga uchradi. Aholi namoyishlari bosh vazir saroyining ishg‘ol etilishi va hukumatning tarqatilishi bilan qisman pasaydi.
Izoh (0)