Исроил кучлари 8 август куни Ғазога берган зарбалар оқибатида 40 нафар фаластинлик ҳалок бўлган. Бу ҳақда Reuters нашри Яқин Шарқ манбаларига таяниб хабар берди.
Манбада айтилишича, пайшанба куни Исроил қуруқлик ва ҳаво кучлари анклав ҳудуди бўйлаб оммавий ҳужумлар ташкил этган. Огоҳлантирмасдан берилган зарбалар оқибатида тинч аҳоли орасида кўплаб қурбонлар бўлган.
Яқин Шарқнинг қатор нашрлари Ғазо марказида ҲАМАС бўлинмалари Исроилга қарши ҳужумга ўтганини билдирган. Исроил эса бунга қарши туриш учун ялпи ҳужум эълон қилиб, бино ва иншоотларни оммавий ўққа тутган.
Исроил ҳаво ҳужумлари дастлаб Ғазо марказидаги ал-Бурайж лагерида кузатилган. Ушбу ҳудудга ракеталар келиб урилиши оқибатида камида 15 киши ҳалок бўлган. Яҳудий кучлари, шунингдек, Нусейрат лагерига ҳам зарба бериб, 4 кишининг ўлимига сабаб бўлган.
Исроил мудофаа кучлари ал-Бурайж ҳамда Нусейрат лагерларида “террорчилар” тўпланганини иддао қилган. 8 августдаги ҳужумлар лагерлар тўлиқ тозалангунга қадар ҳали яна такрорланиши хабар берилган.
Хабарда қўшимча қилинишича, Исроил авиацияси Ғазо ва Хон Юнис шаҳарларига ҳам ҳужумлар уюштирган. Бу икки ҳужум оқибатида камида 6 киши ҳалок бўлган ва 10 га яқин фуқаролар жароҳатланган.
Ғазо шаҳрининг “Туффаҳ” маҳалласидаги Абдулфаттоҳ Ҳамуда ва Аз-Заҳра мактаблари ҳам ҳужумга учраган. 15 киши ҳалок бўлиб, 30 дан ортиқ фаластинлик жароҳат олган. Исроил зарба берилган мактабларда ҲАМАС қўмондонлик пунктлари жойлашганини хабар берган.
Ғазодаги ҲАМАС ва “Исломий жиҳод” ташкилотларининг қуролли қанотлари Ғазо бўйлаб ҳаракат қилаётган Исроил кучларига танкка қарши ракеталар ва миномёт бомбалари билан ҳужум қилганини маълум қилган. Исроил кучлари жиддий зарбага учрагани, аскарлар орасида ҳалок бўлган ва жароҳатланганлар борлиги айтилган.
Изоҳ (0)