Бангладеш бош вазири Шайх Ҳасина 5 август куни мамлакатни тарк этган. Бу ҳақда Жанубий Осиё нашрларига таяниб, CNN хабар берди.
Манбада айтилишича, Шайх Ҳасина расман лавозимидан истеъфога чиққанини эълон қилган. Бу баёнот ҳукумат хатти-ҳаракатларига қарамай Бангладешдаги намойишлар давом этиши ҳамда ҳукмрон элитага қарши нафрат кучайиши ортидан юзага келган.
Бангладеш армияси қўмондони генерал Вакир уз-Замон ҳукуматнинг пойтахтдан чиқиб кетганини тасдиқлаган. Бош вазирнинг ўз вазифасини топшириш қарори Даккадаги президент идорасига ҳужумдан сўнг имзолангани айтилган.
Ижтимоий тармоқларда тарқалган видеоларда бош вазир резиденсияси яқинида ёнғин юзага келганини кўриш мумкин. Қароргоҳни қўриқлаётган ҳарбий қисм кўп сонли намойишчиларга қаршилик кўрсата олмай, уларни ўтказиб юборган.
Бош вазир қароргоҳига ҳужум ортидан Шайх Ҳасина вертолётда мамлакатни тарк этган. Ҳиндистон манбалари у Деҳлидаги Ҳиндон базасида кутиб олинганини хабар берган. Истеъфога чиққан бош вазир Ҳиндистонда нима қилаётгани ҳозирча номаълум.
Бангладеш давлат нашрлари Шайх Ҳасина Лондонга қочаётганини ёзган. Мамлакатдаги ҳозирги вазият собиқ бош вазир учун хавф туғдириши, шу боис у Бангладешга қайта олмаслиги хабар қилинган.
Инсон ҳуқуқларини ҳимоя қилиш ташкилотлари ҳозирга қадар Бангладешда ғалаёнлар оқибатида 100 дан ортиқ фуқаро ҳалок бўлганини ёзган. 5 август куни тўқнашувлар тарихида янги сценарий кузатилиб, полиция пойтахт Даккада оломонга қарата ўқ узган. Оқибатда 67 киши ҳалок бўлган, полициячилардан 13 киши жароҳатланган.
Таҳлилчилар бош вазирнинг кетиши яқин орада тинчликни кафолатлашга асос бўлиши мумкинлигини билдирган. Аҳолининг адолатсиз меҳнат квотасини тақиқлаш тўғрисидаги талаби эса босқичма-босқич амалга оширилиши айтилган.
Изоҳ (0)