Бангладешдаги намойишчилар Нарсингди туманидаги қамоқхонага бостириб кирди ва давлат иш ўринлари учун квота тизимига қарши мамлакат бўйлаб кенг тарқалган норозилик намойишлари фонида юзлаб маҳбусларни озод қилди.
Бу ҳақда AFP мамлакат полициясига таяниб хабар берди.
“Талабалардан иборат намойишчилар Бангладеш марказидаги Нарсингди туманидаги қамоқхонага бостириб кириб, маҳбусларни озод қилди ва кейин қамоқхонани ёқиб юборди”, дейилади агентлик баёнотида.
Қайд этилишича, қамоқдан озод этилганларнинг аниқ сони номаълум, аммо улар юздан ошиқлиги хабар қилинмоқда.
Шу билан бирга, Бангладеш пойтахти Даккада митинглар, юришлар ва йиғилишлар ўтказишга эълон қилинган тақиқ полиция билан тўқнашувларнинг олдини олмади, дейилади хабарда.
Бангладешда талабалар норозиликлари шу ой бошида Олий суд 1971 йилдаги Мустақиллик урушида қатнашган озодлик курашчиларининг қариндошлари учун 30% иш квоталарини тиклаш тўғрисида қарор чиқарганидан кейин бошланди.
Бангладеш суди қарорни бир ойга тўхтатиб қўйганига қарамай, норозилик намойишлари давом этди. Бош вазир Шайх Ҳасина ушбу тоифадаги фуқаролар учун иш квотасига қарши чиққанларни қоралади.
Изоҳ (0)