Ўзбекистондаги давлат мактабларида 40 минг нафардан ортиқ талаба педагоглик қилмоқда. Бу ҳақда Мактабгача ва мактаб таълими вазирлиги бошқарма бошлиғи Эркин Муродов “Дарё” мухбири билан суҳбатда маълумот берди.
Эркин Муродовнинг айтишича, мамлакатнинг олис ва чекка ҳудудларида ўқитувчига бўлган эҳтиёж катта.
“Мазкур эҳтиёжни юқори босқич талабалари ҳисобига қоплаш имконияти бор. Талаба мактабга келгани амалда ишлаб турган ўқитувчининг ўрнини эгаллаб олади, дегани эмас. У фақат вакант бўлган ва ўқитувчига эҳтиёж мавжуд жойларга ишга қабул қилинади. Бугун мактабларимизда 525 минг нафар ўқитувчилар бўлса, шундан 40 мингдан ортиғи талаба. Бунинг унчалик ёмон томони йўқ. Улар эртага мактабга мослашиб, бўлажак ўқитувчилик касбини шарафи ва машаққатини тушуниб борса, фақат яхши томонга бўлади”, деди мутахассис.
Эркин Муродовнинг қўшимча қилишича, икки йил илгари олий таълимда “4+2” тизими жорий этилган.
“Талабаларнинг олти кунлик ўқиш ҳафтасининг тўрт куни олий таълимда, икки куни мактабда ўтади. Бунда 2-босқичдан бошлаб талабалар мактаб билан боғланади. Талаба тўрт йил ўқиб, дарс беришга яна бир йил мослашишга вақт сарфлагандан кўра, 3-4-курслардаёқ мактабга келиб, маҳоратини оширгани яхшироқ”, деди вазирлик вакили.
Маълум қилинишича, ҳозир Ўзбекистонда 10 182 та давлатга қарашли мактаблар фаолият юритмоқда. Уларда қарийб 6,4 миллион нафар бола таҳсил оляпти. Шу билан бирга, республикада 400 тадан ортиқ нодавлат мактаблар ҳам ишламоқда.
Изоҳ (0)