Тошкент шаҳри ва Андижон вилоятидаги савдо дўконларидан акциз маркасиз тамаки маҳсулотлари ашёвий далил сифатида олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, департаментнинг Чилонзор туман бўлими томонидан ўтказилган тезкор тадбирда “С.Б.” МЧЖ савдо дўкони сотувчиси А.Э. харидорга акциз маркасиз тамаки маҳсулотини сотган вақтида ушланиб, ушбу савдо дўконидан умумий баҳоси 128,3 млн сўмлик хорижда ишлаб чиқарилган 29 турдаги жами 1 496 қути акциз маркасиз тамаки маҳсулотлари ашёвий далил сифатида олинган.
Шу каби, департаментнинг Андижон вилоят бошқармаси томонидан ўтказилган тезкор тадбирда “Н.М.” МЧЖ раҳбари С.О. Андижон тумани “Куйган-ёр деҳқон бозори” МЧЖ ҳудудидаги дўконида харидорга хорижда ва Ўзбекистонда ишлаб чиқарилган 50 қути тамаки маҳсулотини сотган вақтида ушланиб, ушбу савдо дўконидан жами 7 480 қути ҳужжатсиз тамаки маҳсулотлари ашёвий далил сифатида олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)