Самарқанд вилоятида электр энергиясидан ноқонуний фойдаланган ғишт ишлаб чиқариш заводи аниқланди. Бу ҳақда “Ўзэнергоинспекция” матбуот хизмати хабар берди.
Қайд этилишича, “Ўзэнергоинспекция” Самарқанд вилояти ҳудудий бошқармаси ва Бош прокуратура ҳузуридаги департамент билан ҳамкорликда назорат тадбири ўтказилган. Тадбирда Булунғур туманидаги “Э.Г.Д.” МЧЖга қарашли ғишт ишлаб чиқариш заводидаги ҳисобга олиш ускунасига ток трансформатори коэффициентини ўзгартириш йўли билан ташқи таъсир кўрсатиб, электр энергиясидан ноқонуний фойдалангани аниқланган.
Ушбу қоидабузарликлар натижасида давлат манфаатларига 1 миллиард 109 миллион сўмлик (1 миллион 286 минг кВт/соат электр энергияси) зарар етказилгани маълум бўлган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкент вилояти Бўстонлиқ туманида икки нафар фуқаро 917,2 миллион сўмлик электр энергиясидан ноқонуний фойдалангани тўғрисида хабар берилганди. Ўзбекистонда 2024 йилнинг биринчи ярмида 550 миллиард сўмдан ортиқ электр энергияси ва табиий газдан ноқонуний фойдаланиш ҳолати аниқланган.
Изоҳ (0)