Қашқадарё ҳокими Муроджон Азимов раҳбарлигидаги ҳокимлик соатида ҳокимнинг икки нафар ўринбосари — Рустам Йўлдошев ва Акбар Эшонқулов ишдан олинди. Бу ҳақда вилоят ҳокимлиги ахборот хизмати раҳбари Аҳрор Содиқов маълумот берди.
Айтилишича, ҳар икки ўринбосар ҳам бошқа ишга ўтиши муносабати билан лавозимидан олинган. Аммо уларнинг қайси лавозимда иш бошлаши ҳозирча номаълум.
Қўшимча қилинишича, вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Рустам Йўлдошев ўрнида Анвар Қобилов иш бошлаган. У тайинловга қадар президент Администрацияси ҳузуридаги Иқтисодий тадқиқотлар ва ислоҳотлар маркази Қашқадарё вилояти филиали раҳбари лавозимида ишлаб келган.
Муроджон Азимовнинг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари лавозимида эса Муродулла Азизов иш бошлаган. Муродулла Азизов тайинловга қадар «Ўзбекнефтгаз» акциядорлик жамияти тижорат департаменти бошлиғи ўринбосари — маркетинг бўлими бошлиғи лавозимида фаолият юритиб келаётган эди.
«Дарё» манбасига кўра, собиқ ўринбосар Акбар Эшонқулов вилоятдаги бошқармаларнинг бирида иш бошлаши кутилмоқда.
Шунингдек, Чироқчи тумани ҳокими Нодир Эркаев фуқаролар мурожаатлари билан ишлашдаги камчиликлари боис ҳайфсанга муносиб кўрилган.
Изоҳ (0)