Олий таълим, фан ва инновациялар вазирлиги янги ўқув йилида талабаларни муносиб кутиб олиш, ўқув йилининг дастлабки кунларида талабаларни турар жой билан тезкор таъминлашда юзага келадиган жиддий муаммоларни ўз вақтида бартараф этиш мақсадида 1 августидан 10 сентябригача бўлган муддат “долзарб қирқ кунлик” сифатида белгиланганини эълон қилди.
![](/static/2024/08/02/photo_2024-07-31_13-46-59-bsut-MG0.jpg)
Қайд этилишича, 2024/2025-ўқув йилидан бошлаб давлат ОТМларининг барча босқич талабалари белгиланган мезонлар кетма-кетлиги асосида талабаларнинг ётоқхона ва ижара хонадонларига жойлаштирилиши бўйича зарур чора-тадбирлар белгилаб олинди.
Ўтган йилги тажрибадан келиб чиқиб, барча ОТМларнинг асосий бинолари ҳамда талабалар турар жойларига кириш қисмларига камида 4 та жойга Талабалар турар жойларига жойлаштириш учун ёрдам кўрсатиш марказлари (инфокиоск)ни ташкил этиш белгиланди.
Бунда ҳар бир талабани талабалар турар жойларига жойлаштириш бўйича ёрдам кўрсатиш марказлари (инфокиоск) фаолиятини йўлга қўйиш ва унга тажрибали волонтёрларни бириктириш, шунингдек, энг намунали фаолият юритган “Талабалар турар жойларига жойлаштириш учун ёрдам кўрсатиш марказлари” 20 миллион сўмдан 30 миллион сўмгача пул мукофотлари билан рағбатлантирилиши назарда тутилди.
Ижара хонадонлари базасини шакллантириш, талабаларни гуруҳ тюторлари орқали ижара хонадонларига жойлашишига кўмаклашиш, олий таълим муассасаси расмий веб-сайти орқали янги топилган ижара уйлари ҳамда ижара уйлари ҳақидаги маълумотлар (манзили, хонадон эгасининг исми шарифи, телефони, ижара уйининг нархи кўрсатилган ҳолда)ни эълон қилиш ишларини самарали ташкил этиш бўйича кўрсатмалар берилди.
Олий таълим муассасалари ректорлари ётоқхона ва ижарада истиқомат қилаётган талабалар ҳолидан шахсан хабар олиши, уларга зарур шарт-шароитлар яратиш бўйича чора-тадбирлар тасдиқлаган ҳолда ижара хонадонларига ҳам, ётоқхоналарга ҳам ташрифлар ҳар ҳафтада камида бир маротаба ташкил этилишини тизимли йўлга қўйилади.
Тошкент шаҳри бўйича 29 та давлат ОТМларида талабаларни турар жой билан таъминлаш бўйича 60 та марказ ташкил этилиши режалаштирилган. Марказларда 200 нафардан ортиқ кўнгилли лидер ёшлардан иборат волонтёр ва тюторлар талабаларни ётоқхона ва ижара хонадонларига жойлашишига кўмак беради.
1 августдан талабалар турар жойи учун my.gov.uz орқали ариза юбориш жараёнлари бошланди. Регламентга мувофиқ, айрим тоифадаги талабалар ётоқхонага устуворлик асосида қабул қилинади. Шунга кўра, талабалар турар жойига жойлашиш учун йўлланма дастлаб имтиёзли рўйхат, сўнг умумий рўйхатдаги навбат бўйича автоматик шакллантирилади.
Изоҳ (0)